Xornada histórica no 34º Trofeo Príncipe de Asturias. Coa estrea de seis novas clases neste segundo día de competición, a cita que organiza o Monte Real Club de Yates e a Escola Naval Militar co patrocinio de ABANCA bateu hoxe o seu récord de participación ao superar os 80 barcos no campo de regatas. En total, son xa once as categorías en liza e preto de 500 regatistas os que se disputan esta fin de semana o triunfo dunha das regatas máis importantes do panorama nacional.
A falta de que se complete mañá domingo o terceiro e último día de regatas, os líderes provisionais son Maria-Casas do Telhado, Bosch Service Solutions, Raygrass III, Albarellos, Bombastic, Salseiro C, Miña Miniña, Bribon 500 Movistar, Stella, Okofen e ¡HOLA! Fashion.
Coa saída programada para as 12:00 horas, o Comité de Regatas dos barcos de maior eslora tampouco o tivo fácil hoxe para dar comezo ás probas do día. O vento volveu ser inestable, rolón e de intensidades moi cambiantes desde o inicio da xornada, e o certo é que non foi ata pasadas as 13:00 horas cando a frota puido poñerse en marcha para completar o primeiro dos tres percorridos de formato barlovento-sotavento.
Na categoría Martin Miller ORC 0-1, a segunda xornada do Príncipe de Asturias provocou un envorco drástico na clasificación xeral. Con dous segundos e un sétimo nestas tres últimas probas, o Maria–Casas do Telhhado fíxose hoxe co liderado da xeral por diante do Mirfak de Diego López, que ocupa agora o segundo posto, e do Aceites Abril de Jorge Pérez Canal, que asalta o podio colocándose na terceira posición. O Pairo 8 e o Yess Too, que ocupaban onte a primeira e a segunda posición respectivamente, hoxe son cuarto e quinto na xeral.
Pola súa banda, na xeral de Aceites Abril ORC 2 o Bosch Service Solutions de Ramón Ojea amplía hoxe a súa vantaxe no máis alto da táboa tras anotarse as tres vitorias parciais postas en xogo. Por detrás, a cinco puntos, mantense tamén no segundo posto o Antilope-Lener de José Luis Alcuso, mentres que o Cachete de Francisco Edreira é quen pecha nesta ocasión o podio provisional da clase.
Tamén disputou tres novas probas a frota de Gadis ORC 3, categoría na que o líder segue sendo o Raygrass III de Jaime Núñez con dous terceiros e un quinto que se suman á vitoria parcial anotada onte. A segunda posición, neste caso, é para o Maracana I de Luís Suárez cun primeiro, un segundo e un sétimo posto nas tres últimas mangas e o Fend-La-Bise de Jean Claude Sarrade escala desde a oitava ata a terceira posición cuns parciais 2-5-1. Outra das vitorias do día foi para o Unus de Luis Manuel García, que marcha cuarto.
Mentres tanto, hoxe sábado estreáronse outras tres divisións de ORC cun percorrido costeiro de 14,5 millas e saída e chegada situada enfronte da baía, na zona de Carallóns. Volvo Autesa ORC 4-5 foi a primeira en arrancar neste campo pasadas as 12:30 horas e a vitoria foi a parar a mans do Albarellos de Fernando Rey, que se converte en líder da xeral. Séguenlle o Santiago Roma Rías Baixas de Iñaki Carbajo e o Chispa Nejra de José Rey Veiga na segunda e terceira posición respectivamente.
En Engels & Völkers ORC Open, o gañador da xornada e líder provisional é o Bombastic de César Fernández. Por detrás, o Piccola de Antonio Gaona colócase polo momento na segunda posición da táboa e o terceiro posto ocúpao o Lacazan de Mariano Benavente.
Tamén nesta clase competiu hoxe o barco inclusivo Axa Seguros, equipo composto por regatistas con diversidade funcional da Escola de Vela Adaptada do Monte Real co apoio da aseguradora e a Consellería de Política Social da Xunta de Galicia.
No caso da clase SH Robotic Open Extra, a frota completou un percorrido costeiro de 14,5 millas nas que resultou gañador o Salseiro C de Manuel Blanco. Por detrás, o Txole de Ignacio Sánchez posiciónase no segundo posto da xeral e terceiro é o Jandrocho Team de Roberto Reboredo.
Os tres barcos que compoñen a frota de Storax Clásicos completaron, pola súa banda, un percorrido de case nove millas con vitoria en tempo compensado para o Miña Miniña de Fabián Garrido. O primeiro en cruzar a liña de chegada en tempo real foi o Sara O de Xosé Avelino Ochoa, resultado que lle sitúa no segundo posto da xeral por diante do Papaleisso de Javier Alonso, que ocupa o terceiro caixón do podio provisional.
Outra das frotas que se estreou hoxe na baía de Baiona foi a dos maxestosos 6 metros. O campo de regatas ofreceu unhas condicións de vento de entre 12 e 15 nós de intensidade que permitiu ao Comité dar a saída para as dúas primeiras probas de regata.
Na categoría de Infinitus Rent 6m Clásicos, o Bribon 500 Movistar, que contou con Pedro Campos á cana ante a ausencia do Rei Don Juan Carlos, foi o claro dominador da xornada ao anotarse as dúas vitorias postas en xogo e situándose no máis alto da xeral provisional. Por detrás, con dous terceiros postos, o Titia de Mauricio Sánchez Bela ocupa a segunda posición e terceiro é o Aida de Francisco Botas.
Pola súa banda, o Stella de Violeta Álvarez estréase no 34º Trofeo Príncipe de Asturias como líder da clase Infinitus Rent 6m Open ao sumar un primeiro e un segundo na súa marcadora. O segundo posto ocúpao o Seljm de Patrik Monteiro e terceiro marcha o Maybe XIV de Eugenio Galdón.
En Solventis J80, envorco na xeral tras a disputa de tres novas probas. O Okofen de Javier de la Gándara anotouse hoxe un pleno de vitorias que o aúpan ata a primeira posición da táboa, relegando ao Miudo de Diogo Costa á segunda posición e a cinco puntos do líder. Tamén baixa un posto por tanto o Pazo de Cea de Cristina Gonzáles Cominges, que pecha o podio provisional no terceiro caixón.
Onde apenas houbo cambios é na xeral da ¡HOLA! Ladies Cup. A frota da prestixiosa competición feminina completou esta tarde dúas novas probas nas que o ¡HOLA! Fashion de Pilar Casares sumou un segundo e un primeiro, resultados que manteñen ao equipo como líderes da xeral. Por detrás, séguelle tamén hoxe o ¡HOLA! Serralleiras de Marta Ramada, mentres que o terceiro posto ocúpao agora o ¡HOLA! Silleiro de Anna Sole Dolcet.
Todo por decidir na última xornada
Mañá domingo celebrarase a terceira e última xornada do Trofeo Príncipe de Asturias con todo por decidir. Se o vento permíteo, todas e cada unha das once clases participantes volverán botarse á auga para arrancar a xornada final a partir das 12:00 horas, e será pola tarde cando se entregarán os premios aos vencedores da trixésimo cuarta edición.
