Só o líder puido con Sergio Álvarez no peche da Volta Isla de Tenerife

Sergio Álvarez subiu ao podio en máis dunha ocasión este domingo na última xornada da Volta Isla de Tenerife. O ciclista do Vigo-Rías Baixas recolleu a camisola de mellor canario na xeral final, o de corredor máis combativo e o de segundo clasificado dunha etapa na que só o líder Adria Moreno (Aix en Provence) evitou o triunfo do representante da entidade presidida por José Luis Chamorro.

Despois do gran traballo colectivo realizado o día anterior polos pupilos de Modesto Pérez camiño do Teide, Álvarez buscaba entrar no Top-10 da xeral e non tardou en moverse no percorrido de 48 quilómetros que unía Santa Cruz coa Cidade dos Adiantados. Á altura do km 15 abandonou a disciplina do pelotón xunto ao líder e a dous corredores do Mutua Levante valenciano, Felipe Orts e Juan Eugenio Belandria.

A diferenza respecto ao grupo perseguidor situouse en torno ao minuto. A falta de 10 km para o final, Álvarez pasou encabezando a escapada pola Meta Volante do Socorro, pero pouco despois Moreno atacou na subida ao porto da Lagoa (2ª categoría) e coroou en primeira posición a ascensión situada a 5 km de meta. O líder levantou os brazos na Ciudad de los Adelantados con 28 segundos de vantaxe sobre o canario da formación flúor e Belandria entrou terceiro a 1:21.

Blanco, quinto na xeral

Dentro dos dez primeiros da etapa tamén concluíu Samuel Blanco. O xefe de filas do Vigo-Rías Baixas finalizou sétimo, a 2 minutos do gañador, e puido conservar a quinta praza na xeral. As diferenzas que se marcaron nesta última xornada permitiron a Álvarez meterse no Top-10 final ocupando o noveno posto.

Por equipos ao conxunto olívico correspondeulle a terceira posición completando os catro días de competición con outros tres corredores entre os 35 primeiros: Jaime Guzmán (28º), Alejandro Martínez Bayán (31º) e Alejandro de Rozas (32º). A próxima cita do calendario será a Volta Ciclista Provincia de València.

Anuncios