No ano no que se cumpre o vixésimo quinto aniversario do histórico “Galicia 93 Pescanova”, o Monte Real Club de Yates reuniu este martes en Baiona a catro dos navegantes que formaron parte do gran proxecto galego de vela oceánica: Javier de la Gándara, Roberto “Chuny” Bermúdez de Castro, Ignacio “Ñaco” Eraso e Guillermo Altadill.
O patrón e os tres tripulantes que competiron na Whitbread Round the World 93-94 encargáronse de liderar, xunto con Pablo Iglesias e Jorge Lorenzo, a un grupo de seis tripulacións dunha importante empresa multinacional que, a bordo de seis veleiros do club, participaron en varias actividades formativas de coaching e team building en augas da ría de Vigo.
A actividade forma parte do proxecto Team Sailing do Monte Real Club de Yates, posto en marcha en 2017. Trátase dun programa co que o club ampliou as actividades que ofrecía ao público xeral máis aló da formación na súa Escola de Vela ou a participación en regatas.
A través de 6 propostas diferenciadas, o Monte Real ofrece a sectores non relacionados directamente coa náutica a posibilidade de achegarse ao mundo da vela co obxectivo de extraer dela beneficios a nivel persoal e profesional.
Das 6 actividades propostas, 3 teñen un carácter máis lúdico, que pasa por vivir a experiencia dunha regata, participar nunha competición para coñecer as Illas Cíes ou descubrir Baiona en veleiro. A outra metade da oferta aséntase en elementos formativos moi relacionados co coaching, incluíndo obradoiros para empresas, sesións de team building para mellorar o rendemento ou workshops para optimizar o traballo en equipo.
Disputar unha regata con compañeiros de traballo nunha das paraxes máis belas da costa atlántica, visitar o único parque nacional mariño de España, adestrar habilidades de liderado para mellorar o rendemento de equipos e o clima laboral dentro dunha empresa, redefinir o rumbo persoal e laboral dos traballadores ou mellorar o uso do tempo son algunhas das posibilidades que ofrece o programa Team Sailing do Monte Real Club de Yates.
