A menos dunha semana da investidura dos alcaldes miñoranos todo apunta a que o goberno de Baiona estará liderado polo socialista Carlos Gómez, despois de que fontes do PP confirmasen a imposibilidade, a día de hoxe, de chegar a un pacto que lles permita proseguir catro anos máis ao mando. A pesar de que non se trata dun feito en firme os populares quedarían fóra da ecuación de goberno co que as posibilidades quedarían reducidas a tres, o tripartito máis probable formado por PSOE, BNG e NÓS, o que lles outorgaría un total de 10 concelleiros dos 17 que forman a Corporación, o pacto entre PSOE, Cs e BNG que lles daría un goberno en minoría grazas ao apoio do nacionalistas pero sen chegar a gobernar, ou por contra o pouco probable acordo entre PSOE, NÓS e Cs.
Así pois entre todas as configuracións posibles, o grupo independente liderado por Carlos de la Peña xoga un papel fundamental ao aparecer en dúas das combinacións que están sobre a mesa e aínda que manifestou abertamente a súa vontade de chegar a un acordo cos socialistas e co BNG, declarou que “aínda quedan moitos temas abertos ademais da definición do marco xeral”. Nesta liña o líder de NÓS mantén que “se as negociacións van atrasadas co grupo socialista, aínda máis o están cos nacionalistas”, aínda que se mantén confiado en que as novidades cheguen de maneira inminente arbitradas polo PSOE. “Non temos en mente unha reunión a tres bandas xa que o que se ocupa de todas as negociacións é o partido socialista como lista máis votada”, engadiu. En canto a un posible acordo co PP, De la Peña afirmou que mantén relacións coa súa cabeza visible e actual alcalde en funcións, Ángel Rodal, a pesar de que estas non chegaron ao plano oficial “politicamente falando”.
A pesar de que as decisións en firme daranse a coñecer nos próximos días todo apunta a varios desmarques, por unha banda o do PP e por outro Cs, xa que este último apenas mantivo achegamentos co resto de grupos durante os últimos días segundo manifestaron fontes dos grupos implicados.
Por outra banda o mutismo dos populares desde a vila mariñeira é total e Rodal prefire manter a cautela. Mentres que os socialistas teñen tres posibles configuracións para gobernar en maioría e outras tantas para facelo en minoría, o caso dos populares é moi diferente ao contar tan só cunha xogada mestra, o tripartito PP, Cs e NÓS.
Carlos Gómez: «Hai boa sintonía, pero faltan flocos»
Lonxe de dar unha resposta en firme, o cabeza de lista socialista, Carlos Gómez, explicou onte a este diario que as negociacións están moi avanzadas para chegar a un acordo de goberno sen matizar de que fórmula serviranse para levar a batuta de mando de aquí ao 2023, de todas as que se atopan encima da mesa. Con todo Gómez adiantou que de poder elixir decantaríase por un goberno de dez e non de nove. “Hai boa sintonía e disposición para gobernar pero faltan flocos”, explicou.
A pesar de que o número un do PSOE continúa mantendo un certo clima de cautela para os posibles pactos que se poidan dar a curto prazo, inclina a balanza cara a un tripartito entre o BNG, NÓS e o seu grupo. Con todo tamén é consciente de que “eses pequenos asuntos que quedan por perfilar como todos os aspectos que puidesen quedar por tratar poderían ser un condicionante á hora de pechar un acordo”, engadiu.
Do grupo nacionalista dáse por descontado que apoiará o goberno dos socialistas ao atoparse recollido na súa programática aínda que calquera decisión adoptada sempre se acorda previamente mediante a celebración dunha asemblea. Neste caso quedaría por confirmar cal será a súa postura final, é dicir, se apoiarán a PSOE e NÓS para que gobernen con oito edís quedándose na oposición, ou se se subirán ao tren do tripartito ata 2023.
