O Concello de Nigrán súmase por terceira vez consecutiva á campaña “Quere o teu mercado” con diversas actividades infantís este sábado na Praza de Abastos de A Ramallosa dende as 10:30 ás 13:30 horas. Así, o dúo “Voltereta e Volvoreta” realizará diversos obradoiros e ás 12:30 protagonizará un contacontos participativo. Haberá agasallos, música, globos… Por último, todos aqueles que suban ás redes socias fotos da celebración no mercado co hashtag @quereoteumercado #quereoteumercado serán agasallados cun mandil e unha mochila térmica. O obxectivo desta campaña á que se suma o Concello de Nigrán é dinamizar o mercado municipal de A Ramallosa e a súa contorna.
“Quere o teu mercado” é o lema en galego da Campaña Internacional dos Mercados, unha iniciativa que a Dirección Xeral de Consumo promove en Galicia en colaboración cos Concellos, as Prazas de Abastos e as Federacións e Asociacións de comerciantes. “Quere o teu mercado” (Love Your Local Market), con orixe no Reino Unido, está promovido a nivel internacional pola World Union of Wholesale Markets, e este ano conta coa participación de mercados de España, Reino Unido, Francia, Alemaña, Holanda, Polonia, Italia, Irlanda, Bélxica, Grecia, Dinamarca, Suecia, Hungría, Serbia, Hong Kong e Estados Unidos.
