O pasado sábado celebrouse unha reunión entre o candidato de Nigrán Decide á alcaldía, José Cuevas Raposo, e os membros do Parlamento de Galicia Eva Solla Fernández, da comisión de Sanidade, Política Social e Emprego; Antón Sánchez García, da comisión de Ordenación Territorial, Obras Públicas, Medio Ambiente e Servizos; e Julia Torregrosa Sañudo.
Na reunión José Cuevas informou da problemática da sanidade pública en Nigrán, facendo fincapé no recorte das ambulancias no Val Miñor, a problemática dos comedores escolares en Nigrán, así como da necesidade de vivenda de protección oficial en Nigrán. Con relación a este tema comentouse a cantidade de xuventude que, ante os prezos prohibitivos da vivenda en Nigrán, teñen que marchar a concellos próximos ao emanciparse.
Renovación da Rúa Otero Pedrayo
José Cuevas tamén expuxo aos parlamentarios a necesidade de que se acometa o arranxo da Rúa Otero Pedrayo, viario de competencia da Xunta de Galicia. Con relación a este tema, cómpre destacar que o pleno do Concello de Nigrán, en sesión plenaria do 28 de xullo de 2016, acordou por unanimidade instar á Xunta de Galicia a iniciar de xeito inmediato os trámites necesarios para a renovación de beirarrúas, instalación de saneamento e abastecemento de auga, así como a mellora do firme, implementando medidas de seguridade viaria, “sen que o alcalde de Nigrán sexa capaz de acreditar que ese acordo fose transmitido á Xunta de Galicia. Ademais, no pleno do pasado mes de abril, negouse a contestar sobre a data en que se remitiu á Xunta de Galicia dito acordo plenario, o que nos leva a pensar que o alcalde non fixo ningunha xestión para arranxar esta rúa”, sinala José Cuevas.
