Carlos Abal expón actuacións para mellorar a seguridade viaria en Camos

O candidato popular á Alcaldía de Nigrán, Carlos Abal, visitou hoxe a parroquia de Camos, cunha charla no Centro Cultural A Camoesa, na que expuxo aos asistentes as propostas de goberno dos populares para o próximos catro anos.

O acondicionamento de viarios e a mellora da seguridade viaria en diversos puntos do municipio son as principais propostas dos populares para a parroquia, ademais de completar a rede de saneamento e abastecemento de auga non só en Camos senón en todo o municipio.

Máis concretamente, o popular expón o acondicionamento da estrada Da Cruz, anchear a Rúa A Levada para permitir a circulación en ambos os dous sentidos no seu tramo máis estreito, o acondicionamento do camiño Os Canos e impulsar a mellora do trazado da estrada Tarela-Camos-Vincios.

Así mesmo, instalará varanda sobre a ponte do Río Muiños ao seu paso pola estrada da Igrexa e un semáforo peonil na Rúa dos Pazos, á altura de Copena, e solucionará o problema de noiros existente entre Piñeiros e Chandebrito. A batería de propostas para esta parroquia contempla tamén a implementación dun Plan de Mantemento e Limpeza de Camiños e ampliar a cobertura de fibra óptica, non só en Camos senón en todo o municipio.

A Asociación de Veciños A Unión, en San Pedro, e a Estación Marítima de Panxón, son as dúas últimas citas cos veciños para o candidato popular, que se celebrarán o mércores e o xoves, respectivamente, ás 20:00 horas.

Anuncios