Desde Gondomar ata o Mutua Madrid Open 2019

Os asistentes viviron unha fin de semana de tenis de elite, nun campionato que se estendeu ao longo da semana.

Un total de 64 miñoranos acudiron ao Mutua Madrid Open para vivir en primeira persoa o mellor tenis do mundo. A iniciativa, organizada polo Club de Tenis Gondomar, bateu records de asistencia e nela participaron alumnos, pais e simpatizantes do equipo que, durante o 4 e 5 de maio, acudiron á capital española para vivir unha experiencia diferente na que os apaixonados da práctica deportiva viron moi de preto a xogadores como Rafael Nadal, Roger Federer, Carla Suárez ou Jelena Ostapenco, entre outros.

Este diario tivo a oportunidade de falar co artífice dunha actividade que leva catro anos celebrándose de maneira ininterrompida, Juan Antonio Freitas Fernández, director da escola gondomareña, que aclarou que a iniciativa naceu co fin de motivar ao seu alumnado, aínda que a acollida deste ano superou todas as expectativas de participación. “O primeiro ano que o propuxen fomos un total de 43 persoas e aos poucos fomos aumentando ata chegar á cifra de 64”, engadiu.

Así pois o que nun principio naceu como unha mera actividade complementaria á docencia deportiva, na actualidade converteuse nunha cita obrigada de carácter anual que ademais de gozar de gran aceptación serve como un aliciente para as relacións interpersoais. “Precisamente aceptamos a todos aqueles que o desexen a que se animen a acompañarnos polo feito de pasar unha fin de semana en comunidade máis aló do que supón unha competición deste calibre”, mantivo. O director da entidade explicou que para chegar á capital servíronse de autobuses e coches particulares pero se a afluencia segue en aumento para a próxima edición veranse na obrigación de fretar outro autocar para seguir dándolle empuxe á súa actividade anual. A pesar de que a competición se alongou toda a semana e que a final se celebrou este domingo, a dirección do centro optou por viaxar ao comezo do campionato para que os alumnos puidesen ver en acción a todos os participantes ao comezo das fases eliminatorias.

Actividades diferentes

Desde a súa fundación en 2006, o Club de Tenis Gondomar, apostou polo tenis base fomentando a práctica deportiva con alicientes que se saen do habitual como a viaxe realizada a semana pasada, o que levan a cabo para competir nun torneo anual que se celebra en Béjar, Salamanca, ou “ xuntanzas” para disputar torneos intensivos de 12 horas de duración abertos tamén ás familias dos alumnos. Trátase dunha maneira diferente de inculcar un deporte e que lles valeu para que a Federación Galega de Tenis nomeáselles como o “mellor club base de Galicia”. Actualmente a agrupación conta con máis dun centenar de socios e tras 14 anos de actividade pasaron pola escola máis de 300 nenos.

Anuncios