A última xornada do Campionato de España de Ciclismo Adaptado en Estrada foi a máis frutífera en canto a presenza nos podios para a Selección de Galicia. Tres representantes do combinado autonómico alcanzaron medalla nas probas en liña celebradas en Salamanca. Mila López, Severino Mata e Iván Montero conseguiron rematar segundos nas súas categorías.
A baionesa López aboouse á prata en WH4. Acadouna na contrarreloxo individual do sábado e repetiu ese posto o domingo tras dar seis voltas ao circuíto da capital charra. A disposición no podio foi a mesma nas dúas xornadas, con Eva Moral (Madrid) como gañadora e Ione Basterra (Euskadi) na terceira posición.
A orde variou noutra das probas de handbike, na de MH5. Montero quedouse a sete segundos de asinar un dobrete nestes campionatos. Gañador da CRI, nesta ocasión o coruñés finalizou por detrás de Juan Tamarit (Valencia) despois de sete voltas. A terceira praza, do mesmo xeito que o día anterior, correspondeulle a José Vicente Arzo (Unlimited Wheels).
O quinto e definitivo metal galego en terras salmantinas levou a sinatura de Severino Mata en MC5. Quinto na contrarreloxo, escalou ata o segundo posto na carreira de fondo. O gañador foi o murciano Juan Antonio Sánchez e coa terceira posición fíxose Jairo Ruiz.
A expensas de completar os resultados coas clasificacións oficiais, na actuación galega tamén hai que anotar o sexto posto de Juan Permuy e o sétimo de Alejandro Ferradás, ambos en MH2, e o noveno de Álvaro Illobre en MH4.
