A problemática que envolve a clausura da porta traseira do CEIP Mallón de Nigrán volveu a dar un envorco inesperado, e as reunións mantidas entre rexedor e directiva do centro educativo parece que chegaron a bo porto. Tras manter unha conversación telefónica, na mañá de onte, co xefe territorial de área da Xunta, concluíron que finalmente é viable levar a cabo a apertura controlada do acceso «garantindo unhas medidas mínimas de seguridade». González pola súa banda mostrouse satisfeito co xiro dos acontecementos e coa comprensión do representante da Administración. «A verdade que desta maneira poderemos atender ás peticións das familias afectadas», engadiu. En canto á data de reapertura do acceso que dá a Camiño do Pozo, o rexedor adiantou que levarase a cabo canto antes, «presumiblemente a partir do luns da próxima semana». González declarou que agora mesmo é unha cuestión de prazos xa que hai que esperar a que o vindeiro luns o Consello Escolar referende o acordo adoptado e a posibilidade de que a Xunta se bote atrás «é improbable», segundo declarou a este diario o alcalde nigranés.
Así pois polas mañás estableceranse uns horarios de apertura e peche programados que estarán supervisados pola conserxe do centro, ademais das tardes que haxa clases de apoio. Se por calquera motivo faltase esta figura de control no centro, González explicou que terían que volver sentar para buscar unha nova fórmula que garanta uns mínimos de control aos pequenos, aínda que polo momento parece que esta situación non se vai a producir.
A pesar de que a reunión informativa programada para onte ás 18:30 horas xa non foi necesaria, o alcalde recibiu no consistorio aos pais que así o desexaron.
