O BNG de Gondomar lamenta a limitada oferta de espazos públicos para actos electorais

A responsable local do BNG de Gondomar vén de presentar no Concello unha solicitude para ampliar a relación dos espazos públicos que se poñen ao dispor das candidaturas participantes diante das convocatorias electorais do 28 de abril e 26 de maio.

Trátase de facilitar ás formacións políticas a posibilidade de convocar actos públicos de distinto formato e dimensión durante as campañas electorais, evitando condicionantes como as barreiras arquitectónicas (Casa da Cultura), actividade cultural (Auditorio Lois Tobío) ou condicións acústicas e de espazo inadecuadas (Pavillón Municipal), que presenta a oferta que se ven facendo até agora, sendo ademais todos eles, lugares pechados.

A solicitude do BNG lembra a necesidade de facilitar unha relación de espazos o máis ampla e acaída posible, e propón incluír a sala de actos do Centro Neural e, cando menos, algunha das prazas públicas da vila que permitan desenvolver actos ao aire libre e faciliten o achegamento da mensaxe política á veciñanza.

Esta mesma petición xa foi presentada para os procesos electorais de 2015 e 2016 mais nunca houbo resposta nin rectificación por parte do goberno municipal. O BNG lémbralle ao Alcalde que aínda está a tempo de modificar a oferta diante da Xunta Electoral.

O BNG insta tamén a revisar a situación das mesas de votación

O BNG insta ao concello a revisar a idoneidade da situación das mesas de votación nalgúns locais electorais. Tense detectado nalgún caso que se atopan en lugares con barreiras arquitectónicas (escaleiras) que dificultan o exercicio do voto a persoas con mobilidade reducida, en zonas elevadas (escenarios) con risco de caídas, ou en espazos pouco acondicionados para pasar alí tantas horas as persoas que forman parte das mesas (pavillón).

Anuncios