Coa chegada da primavera, recentemente inaugurada esta semana, a Liga de Inverno de J80 do Monte Real Club de Yates encara xa a súa recta final coa celebración, este sábado, da penúltima xornada de probas.
O Okofen, liderado por Javier de la Gándara, é o veleiro mellor situado na clasificación provisional tras a vitoria que logrou na anterior xornada, na que lle arrebatou o liderado ao Cansino de Fernando Yáñez.
Séguenlle, a certa distancia, e empatados a puntos, o Cansino e o Namasté, patroneado por Luis de Mira. Ocupan, respectivamente, a segunda e terceira posición e son, a día de hoxe, as tripulacións con máis opcións a arrebatarlle o ouro do campionato a Gándara.
Mañá sábado, a partir das tres da tarde, veremos novamente aos os dez J80 participantes pelexando por escalar postos na clasificación rumbo ao podio. O comité de regata ten previsto dar saída a tres probas do tipo barlovento-sotavento nun campo de regatas que se situará no interior da baía de Baiona.
A previsión meteorolóxica anuncia ventos do nornoroeste que irán rolando a norte puro conforme avancen as horas, e que soprarán cunha intensidade de entre 6 e 9 nós, o que permitirá á frota navegar sen problemas.
Ademais, lucirá o sol, o que permitirá que o público que se achegue á península de Monte Boi ou ás praias circundantes poida gozar da competición.
