O baionés Daniel Pazó, vencedor do II Trail Adventure Muíños do Folón

Daniel Pazó resultou este domingo vencedor da II Edición do Trail Adventure Muíños do Folón celebrado no Rosal, con boa temperatura e moito ambiente. O baionés foi un dos máis de 200 inscritos na modalidade Advance, completando 21 quilómetros de percorrido.

Moi pronto se empezaron a colocar os favoritos na cabeza. Pazó, do Club Atletismo Baiona, e Marcos Fernández, do Club La Gramola. Por detrás Fran Salgueiro do Corredeiras Trail. A eles e a todos esperáballes unha segunda parte de carreira, de subida a San Xiao, tremendamente esixente, ideal para os amantes do bo trail.

A sorpresa para todos é que cando se esperaba un man a man final entre Daniel e Marcos, os dous, previa conversación, decidían entrar xuntos da man na liña de meta. O crono daba por vencedor ao baionés, sendo segundo o ourensán de Ponte Liñares, ambos cun rexistro de 1.53.54. O podio completábao Fran Salgueiro con 1.56.28.

Anuncios