A Deputación destinará case 3 millóns de euros á comarca do Val Miñor a través do Plan Concellos 2019

O goberno da Deputación destinará neste novo ano 2019 á comarca do Val Miñor a través do Plan Concellos un total de 2.980.865,33 euros, o que supón un incremento do 3,23% con respecto ao exercicio anterior. Máis polo miúdo, a institución provincial pon a disposición de Nigrán 1.025.470,24 euros, o que supón case un 3% máis que no exercicio anterior; en canto a Gondomar, disporá de 1.003.879,76 euros, un 3,5% máis que en 2018; e para Baiona, o goberno provincial destina 951.515,33 euros, un 3,23% máis que o ano pasado.

Ata agora na comarca do Val Miñor os investimentos do Plan Concellos dos últimos tres anos financiaron a realización de 78 obras e infraestruturas e a creación de 300 posto de emprego e de formación.

Neste novo ano 2019, no total da provincia, a Deputación de Pontevedra pon a disposición dos 59 municipios ao través do Plan Concellos case 43 millóns e medio de euros, o que supón un 3,3% máis que no exercicio do 2018. No que respecta á liña 1, destinada a investimentos, a institución provincial pon a disposición dos concellos 30 millóns de euros; no caso da liña 2, de amortización, pago de débedas e gastos correntes, son 3,9 millóns; e por último, para a liña 3, destinada a contratación de empregados, irán 9,5 millóns de euros.

A presidenta da Deputación, Carmela Silva, definiu o Plan Concellos como “o corazón dos investimentos na provincia para poñer a disposición dos concellos máis recursos que nunca na súa historia”. A presidenta puxo en valor “os centos de obras feitas co Plan, obras imprescindibles, dotacións, equipamentos, saneamento, abastecemento, políticas sociais, de igualdade, medio ambientais ou de creación de emprego”. “O Plan Concellos é o gran plan da Deputación de Pontevedra, dixo Silva, que ten realizado un cambio radical de modelo no que os recursos se reparten con criterios obxectivos e chegan a todos os concellos sexan da cor política que sexan. Un plan que chegou fai catro anos para quedarse”. A presidenta provincial lembrou que “este ano todos os concellos recibirán máis recursos que nunca para con elo permitir que calquera persoa, viva onde viva, tiña garantidos os servizos básicos e os dereitos”

Táboa de investimentos do Plan Concellos 2019 e a comparativa co 2018