Alumnos de Baiona reivindican o fin da violencia de xénero a ritmo de rap

Este luns culminou o programa “Rap contra a violencia de xénero”, que comezou o pasado 17 de outubro no CPI Cova Terreña e no IES Primeiro de Marzo co obxectivo de abordar a problemática da violencia de xénero entre os e as adolescentes de Baiona. Preto de 200 alumnos e alumnas de 3º e 4º de ESO reivindicaron a través das 30 cancións creadas a ritmo de rap valores como a prevención, a convivencia e sobre todo o respecto mutuo.

Trátase dunha iniciativa da Concellería de Igualdade e o Centro de Información á Muller, coa cofinanciación da Deputación de Pontevedra a través do proxecto “Xénero Versus”. Baséase no convencemento da utilización da música, o RAP neste caso, como canle comunicativa adecuada e moi aceptado na fase da adolescencia. Traballar con este estilo de música é a mellor forma de motivar e estimular ao alumnado.

O programa constou de tres fases, con catro sesións presenciais durante o horario escolar no CPI Cova Terreña e o IES Primeiro de Marzo de Baiona. O obxectivo e impulso que moveu este proxecto foi o de poñer os coñecementos pedagóxicos e musicais en mans de adolescentes de 3º e 4º da ESO para que fosen quen compuxese a letra, elixisen a música e finalmente gravasen unha canción de rap na que puidesen expresar as súas opinións acerca dun tema tan importante como de actualidade que ten que ver con eles/as como o inquietante aumento da violencia de xénero entre adolescentes.

Trátase dun programa que funciona por varios motivos, por unha banda, provoca a súa reflexión como grupo sen portavoces adultos, e a través dun compromiso con este proxecto musical será positivo nas súas relacións e roles grupais. Ademais, o Hip-Hop pode abrir unha vía de comunicación bidireccional proporcionando á persoa a posibilidade de expresar aquilo que non pode transmitir doutra maneira e á súa vez, proporciona unha canle comunicativa ao educador e á sociedade para transmitirlle información á persoa.

Por que utilizar a música na educación pola Igualdade e contra a violencia de xénero? Porque en xeral unha porcentaxe moi alta do alumnado da ESO recoñece escoitar música todos ou case todos os días, e a maior idade o alumnado de secundaria identifícase nun maior grao cos seus amigos e amigas e concede unha maior importancia a compartir os seus gustos musicais. De tal maneira, que traballar na aula con música é a mellor forma de motivar e estimular ao alumnado, xa que unha canción implica sempre traballar a letra educando a intelixencia verbal, traballar a música educando a intelixencia musical e potenciar a creatividade, o intercambio de opinións, o respecto ás ideas alleas, a tolerancia, o diálogo con compañeiras e compañeiros, a reflexión, a introspección… educando así tamén a intelixencia emocional.

Primeiro de Marzo 3ºA – 1 – Andrés, Damián, Marta, Sara e Aldara