No IES Auga da Laxe de Gondomar reivindican que todos os días son 25 de novembro. Tanto é así que no centro impártese a materia de Igualdade de Xénero en 2º de ESO, á que asisten 11 alumnos e alumnas. Para conmemorar o Día Internacional contra a Violencia de Xénero, as actividades increméntanse durante este mes.
Os días 8 e 14 pintaron en diferentes espazos do recinto escolar e na zona do mercado frases alusivas a favor da igualdade e o respecto e en contra da violencia contra as mulleres, e este xoves colocaron 90 globos negros na entrada do instituto, un por cada unha das vítimas da violencia machista rexistradas en España desde o pasado mes de xaneiro, as oficiais e as non oficiais, co seu nome e idade.
