A Policía Local de Nigrán, realizando controis de alcoholemia rutineiros durante o fin de semana pasado, procedeu a denunciar a tres condutores, un de carácter administrativo e dous de carácter penal, por extralimitar as taxas permitidas de consumo de alcol para a condución, durante a noite do sábado ao domingo.
Un home de nacionalidade española, de 40 anos, veciño de Gondomar, foi denunciado administrativamente, ao dar un resultado positivo na proba de alcoholemia. Esta persoa, que conducía un ciclomotor, non se detivo ante un control efectuado pola Garda Civil de Baiona-Nigrán, sendo interceptado posteriormente pola propia Garda Civil, que solicitou a colaboración da Policía Local de Nigrán, para realizar a citada proba, dando como resultado un positivo administrativo.
Ás 5:25 horas do domingo, os axentes observaron un turismo circulando de maneira irregular e a unha velocidade moi por baixo da permitida. Unha vez o vehículo foi detido, apreciaron que o seu condutor presentaba indicios de conducir baixo os efectos do alcol, practicándolle as probas de detección alcohólica. O condutor de nacionalidade española, veciño de Nigrán, de 50 anos, deu un resultado positivo de 1,24 mg/l, infracción de carácter penal, instruíndo dilixencias xudiciais e sendo citado para xuízo rápido.
Por último, os Policías deron o alto a un condutor de nacionalidade estranxeira, veciño de Vigo, de 34 anos de idade, xa que conducía neste caso a unha velocidade superior á permitida e ao observar á unidade policial reduciuna considerablemente, levando con iso unha condución irregular do vehículo.
Este condutor non obtivera nunca un permiso de conducir, ademais de conducir baixo os efectos do alcol, cun resultado positivo de 0,92 mg/ l, polo que se instruíron dilixencias xudiciais por ambos os dous delitos contra a seguridade do tráfico, poñendo a disposición xudicial o vehículo co cal conducía e sendo citado para xuízo rápido.
