A tempada de ciclocrós arrancou con Adrián Valverde subindo ao máis alto do podio. O especialista do Club Ciclista Rías Baixas obtivo o triunfo entre os corredores de categoría Elite este domingo na localidade pontevedresa de Poio, escenario da cita inaugural da Copa Galicia.
O representante da entidade presidida por José Luis Chamorro cruzou a liña de meta en terceira posición, por detrás de dous ciclistas Sub-23. Iván Feijoo (Maceda) adxudicouse a vitoria absoluta con 56 segundos de marxe sobre Adrián Barros (Ponteareas), que avantaxou en 5″ a Valverde.
A principal ameaza para o de Baiona entre os elites foi o portugués Vitor Santos. O luso terminou a 11″ do corredor do Club Ciclista Rías Baixas. O podio desta categoría completouno Luís Fernández Oliveira (Avanza).
A primeira defensa da camisola de líder Elite chegará para Valverde este venres en Santiago de Compostela.
