O Campionato de España de Pádel Surf pecha a programación do 525 Aniversario da Arribada

FOTO: CONCEPWORKS.ES

Baiona poñerá o broche de ouro este fin de semana á programación deseñada pola Concellería de Actividades Marítimas para conmemorar o 525 Aniversario da Arribada co Campionato de España de Paddlesurf, que forma parte xunto unha variada oferta de actividades do Salitre Fest, o maior evento nacional desta modalidade. Unha programación que se prolonga máis aló do deportivo con actividades paralelas de lecer, con concertos e zona de food truck, barra e market.

O festival arranca hoxe mesmo coa apertura da zona de lecer e o concerto de La Chata Soul, ás 21:00 horas. O sábado 29 será cando comecen as probas deportivas que reunirán aos mellores deportistas de España de paddlesurf, en todas as categorías. Pola mañá, terán lugar os Sprints das categorías júnior, nas que participarán uns 50 deportistas. Ás 12:30 animará o Salitre Fest a música de Dj Tom. Pola tarde, será a quenda das probas da categoría absoluta co Campionato de España de Longa Distancia, un percorrido total de 15 quilómetros que transcorrerá nunha hora e corenta minutos, aproximadamente, e que reunirá a máis dun centenar de deportistas. Mentres se dispute esta proba, que levará aos deportistas a realizar un percorrido pola baía de Baiona, ata As Estelas, a praia da Ribeira acollerá unha competición de crossfit. Os mellores clasificados da proba de Longa Distancia pasarán a formar parte da selección española do Mundial de Paddlesurf que se celebrará en China. A xornada culminará co concerto da banda tudense Best Boy (Premio Maketón 2017).

O domingo, 30 de setembro, volverán ser as categorías júnior as que disputen o Campionato de España de Longa Distancia cun percorrido de 3 e 8 quilómetros. Ese mesmo día está previsto que se celebren as semifinais e finais da Carreira Técnica así como os Sprints Open, feminino e masculino. A música do domingo poñeraa o Dj set FONKID (Under the ball), durante a sesión vermú.

En total, Salitre Fest congregará a máis de 150 deportistas, entre os que se atopan a mallorquina Laura Quetglas, flamante campioa de Europa e bronce mundial; os tamén internacionais Pepe Oltra, Román Freijo, Jurgui Zulaika, Rafael Sirvent ou Pablo Ania, e a viguesa Marta Abruñedo.

Na zona market estarán marcas relacionadas co deporte. A Facultade de Ciencias da Educación e o Deporte da Universidade de Vigo ocupará dúas carpas, nas que se realizarán estudos antropométricos aos deportistas.

“O Campionato de España de Stand Up Pádel é un evento de natureza itinerante pero que neste caso sen precedentes decidiron, desde a Federación Española de Surf, que se organizase durante 4 anos consecutivos na baía de Baiona polas perfectas condicións que ofrece para a realización deste evento e pola garantía que ofrece este enclave para que o campionato salga adiante coas mellores garantías, e que conta cunha organización sen igual”, manifestou o Concelleiro de Actividades Marítimas, Raúl Costas Lafuente.

O Salitre Fest é o resultado dun arduo traballo que comezou fai sete anos da man do concelleiro Raúl Costas e de Coque Araujo, director do evento. “Ambos viñemos colaborando estreitamente para fomentar a práctica deste deporte que cada día conta con máis adeptos na nosa baía. En 2011 comezouse cunha travesía popular e en poucos anos, e moito traballo, xa estamos a organizar o campionato nacional por cuarta vez consecutiva”, destacou Costas.

A praia Ribeira será o escenario que acolla e congregue aos máis de 150 deportistas do mesmo xeito que hai 525 anos acolleu a Martín Alonso Pinzón, á súa tripulación e á Carabela Pinta. A organización engranou todo para achegar máis este deporte ao público xeral para que todas as probas deportivas saísen desta praia histórica, onde en 1493 fíxose partícipe ao mundo da noticia do descubrimento de América, de modo que os asistentes ao festival poidan gozar de igual modo da competición.

“Trátase dun evento moi importante para Baiona no deportivo, pero tamén o é a nivel turístico e económico. Os deportistas veñen acompañados por un gran número de persoas que pasan todo o fin de semana na vila, enchendo hoteis e os restaurantes. Tamén é unha iniciativa acollida con gran entusiasmo polos comerciantes baioneses e supoñerá un impacto económico para os negocios locais”, comentou o Alcalde, Ángel Rodal.

“Tampouco debemos deixar de lado a repercusión mediática dun evento destas características que levará as imaxes da baía de Baiona a centos de fogares. Baiona é unha Vila atlántica, rodeada e marcada polo mar, porque vive e convive con el a través do seu porto, dos seus mercados, das súas praias, da súa gastronomía e tamén, coa aposta por este tipo de eventos da actividade de lecer ou deportiva”, conclúe Rodal.

PROGRAMACIÓN PROGRAMACIÓN DEPORTIVA
Venres, 28: Venres, 28:
17.00-20.00 Confirmación inscricións e entrega dorsais
18.00 Presentación e test de material 2019 18.00 Presentación e test de tablas Starboard 2019 a cargo de Waira
18.00 Apertura zona Market, food trucks e barra Mahou 18.30 Volta recoñecemento circuítos de competición
21.00 Escenario Woodtown: concerto La Chata Soul
Sábado, 29: Sábado, 29:
08.00-09.00 Confirmación inscricións e entrega dorsais Sub 18-16-14-12
09.30 Reunión competidores Sprints Sub 18-16-14-12
10.00 Sprints categorías Sub 18-16-14-12
11.00 Apertura zona Market, food trucks e barra Mahou 10.00-12.00 Confirmación inscricións e entrega dorsais Open-Amateur
12.30 Sesión vermú Dj Tom
16.30 Reunión competidores Open e Amateur
17.30 Saída Longa Distancia Open e Amateur
21.30 Escenario Woodtown: Concerto Best Boy
Domingo, 30: Domingo, 30:
08.30 Reunión competidores Sub 18-16-14-12
09.00 Saída Longa Distancia Femenina Sub 18-16-14-12
11.00 Apertura zona Market, food trucks e barra Mahou 10.30 Saída Longa Distancia Masculina Sub 18-16-14-12
12.00 Semifinais Carreira Técnica Masc. Open (2 Mangas, 1 vuelta)
12.30 Sesión Vermú Dj FONKID (Under The Ball) 12.30 Final Carreira Técnica Feminina Open (2 vueltas)
13.00 Final Carreira Técnica Masculina Open (2 vueltas)
14.30 Sprints Open Femininos e Masculinos
17.00 Entrega de premios Campionato de España e 525 Aniversario