Último fin de semana para degustar “As Tapas do Conde” que organiza a Asociación de Empresarios e Comerciantes do Val Miñor (Ovalmi) e a Concellería de Comercio de Gondomar.
Os 13 establecementos que participan neste concurso gastronómico ofrecen gran variedade de tapas doces e salgadas por tan só 2,50 euros, desde elaboracións máis clásicas a outras máis vangardistas: galiburguer, cornete de pistacho, bacallau con garavanzos, chipiróns encebolados, tosta de vieira con pisto de fungos, salpicón de marisco e Dijon, filloa rechea de crema de noz, flan, leite frito, crema de pexego, torta de chocolate branco con noces…
Os consumidores decidirán ademais cos seus votos cal é a tapa gañadora nas categorías doce e salgada. Entre os participantes na votación sortearase un teléfono móbil Wiko View 2 Go de 32 GB. Para participar terán que selar o gastromapa que estará á súa disposición nos establecementos participantes en catro locais diferentes e depositar os seus votos nas urnas que alí atoparán.
Os establecementos participantes nesta sexta edición son Restaurante Pazo da Escola (Mañufe), Restaurante La Vitrola, A Bodega do San Xoán, Bocatería Lalo’s, Cafetería Keik, Cafetería Alameda, Bar Couso, Café Bar Estanco, Tapería A Galiña, Jamonería Tapería Bastión, Tapería Adechape, Tapería Café As Novas Torres e Restaurante Casa Soleiro.
