Anuncios
Ticker de novas

A Garda Civil detén a un veciño de Vigo por exhibicionismo nas praias de Nigrán

A Garda Civil detivo a pasada semana a un veciño de Vigo, de 31 anos, como suposto autor dun delito continuado de exhibicionismo ante varios menores en distintas praias do municipio de Nigrán.

As investigacións levadas a cabo por efectivos do Posto Principal da Garda Civil de Baiona-Nigrán iniciáronse a principios deste mes por mor das denuncias presentadas por catro menores informando de que, en días diferentes e en distintas praias do Nigrán, viran a un individuo nunha motocicleta que se paraba fronte ao areal e mostráballes os xenitais.

Por mor das pescudas realizadas o suposto autor non tardou en ser localizado cando merodeaba polas inmediacións da praia de Panxón, sen que fose interceptado ao desobedecer os sinais de alto e darse á fuga cando circulaba coa súa habitual motocicleta.

As investigacións prolongáronse no tempo e a pasada semana os efectivos do Posto de Baiona-Nigrán conseguiron localizalo e detelo en Vigo como suposto autor, non só dun delito contra a liberdade sexual, por exhibicionismo ante menores, senón tamén doutro delito contra a seguridade viaria pola condución neglixente e temeraria que realizou cando se deu á fuga o día que desobedeceu o sinal de alto dos axentes.

As dilixencias instruídas entregáronse no Xulgado de Instrución de garda de Vigo e a investigación continúa aberta dado que non se descarta a posibilidade de que existan máis casos de exhibicionismo cometidos por esta mesma persoa, sen denunciar.

Anuncios