Anuncios
Ticker de novas

Inscricións abertas para participar no Trail Serra do Galiñeiro

Xa está aberto o prazo de inscrición para participar no Trail Serra do Galiñeiro. Trátase dunha das poucas probas que Galicia Máxica Trail Adventure organiza desde o seu primeiro ano, xunto co de Moaña e o Courel. O Trail Serra do Galiñeiro é unha proba moi querida polos corredores de trail de ambas as dúas beiras do río Miño grazas ao seu perfil agreste e salvaxe, con zonas de escalada en roca granítica, as marabillosas vistas sobre a ría de Vigo e a baía de Baiona, así como o ambiente festivo que os afeccionados xeran preto da cima.

Este ano o percorrido apenas mantén trazas dos de anos anteriores, posto que a organización cambiou a zona de saída/chegada ao centro de Gondomar, no canto de facelo en Vincios, o que foi unha volta de torca máis a un dos clásicos. Do Trail de 22 km e 980 D+ apenas se repiten 3,5 km, o Mini de 15,5 km e 520 D+ é completamente novo, así que esperan que os atletas gocen dos cambios.

No Trail haberá premios para os tres primeiros clasificados da xeral e de cada categoría (Sénior, Veteranos I e Veteranos II). No Mini Trail só serán premiados os tres primeiros homes e as tres primeiras mulleres. Tamén haberá competición por equipos.

Os interesados en participar deberán inscribirse e efectuar o ingreso do importe correspondente no prazo indicado e a través da web de Prozis. A inscrición inclúe a participación na proba, avituallamentos intermedios, avituallamento final, seguro de accidentes e recordo da proba. Máis información en galiciamaxicatrail@gmail.com ou no teléfono 660 697 978.

Fase Evento Prezo Data límite de pago
Fase 1 Trail 22 km 20 € Ata o 16 de setembro de 2018
Fase 2 Trail 22 km 25 € Desde o 17 de setembro ata o 26 de setembro de 2018
Fase 1 Mini Trail 15,5 km 15 € Ata o 16 de setembro de 2018
Fase 2 Mini Trail 15,5 km 20 € Desde o 17 de setembro ata o 26 de setembro de 2018
Anuncios