Anuncios
Ticker de novas

A Romaría da Virxe da Rocha marca o fin do verán en Baiona

FOTO: MIRIAM RODRÍGUEZ // Romaría da Virxe da Rocha.

Este domingo, como vén sendo costume e tradición e coincidindo co último domingo do mes de agosto, Baiona celebrou a romaría da Virxe da Rocha, na que veciños e visitantes poden gozar dunha xornada campestre na área recreativa Mercedes de la Escalera.

O disparo de salvas abriu a xornada ao mediodía, e ás 13:00 horas comezou a Misa Solemne ao pé do monumento, oficiada polo párroco da Ex Colexiata de Santa María de Baiona, Manuel Salcidos.

Unha vez finalizada a eucaristía, comezou a tradicional comida campestre, na que os romeiros puideron degustar as habituais sardiñas asadas, o pan de millo e o viño, principais reclamos desta romaría que marca o fin do verán na localidade, mentres gozaban da música e o baile tradicional galego da man da Escola de Danza Vila de Baiona, as Pandereteiras de Monte Boi e o Grupo de Gaitas “A Seneira”.

A romaría da Virxe da Rocha está organizada pola Concellería de Cultura de Baiona, que dispuxo nesta ocasión 250 kg de sardiñas, 200 pezas de pan de millo e 200 litros de viño do país a 3 euros a ración.

O 18 de setembro de 1910 colocouse a primeira pedra do monumento e na que se depositou unha caixiña de zinc contendo dúas moedas de ouro, dúas de prata e dúas de bronce, xunto cunha copia do acta de tal acontecemento. A súa construción foi posible por subscrición popular e por unha importante colecta de emigrantes españois en Cuba. A escultura foi inaugurada o 14 de setembro de 1930 e ao longo dos anos foi festexada con diversos actos e cerimonias relixiosas e profanas que aínda hoxe en día seguen repetíndose como marca o costume e tradición o último domingo de agosto ao pé do monumento.

Esta Virxe pétrea é única na súa clase, o seu manto arranca da mesma rocha do outeiro do monte chamado Sansón, áchase a 100 metros sobre o nivel do mar e ten unha altura de 15 metros desde a base. É toda de pedra excepto a cara e as mans, que son de mármore branco de carrara. O interior do monumento está oco e contén unha escaleira de caracol de 45 chanzos que permite subir ao barco que a Virxe sostén na súa man dereita, con capacidade para 7 persoas e que vén sendo un asombroso miradoiro desde onde se contempla o océano atlántico, as illas Cíes e a vila de Baiona.

O monumento foi deseñado e realizado polo arquitecto porriñés Antonio Palacios e polo enxeñeiro caldense Laureano Salgado Rodríguez. A cara e as mans de mármore foron esculpidas polo escultor madrileño Ángel García Díaz e as escaleiras interiores de caracol realizounas o artista baionés Ángel Fernández González (Vernet).

El pase de diapositivas requiere JavaScript.

Anuncios