Este mércores presentáronse as Xeiras do IEM nun acto celebrado nas murallas da Fortaleza de Monte Real. Son doce visitas guiadas e dirixidas por especialistas no tema da visita, de interese histórico, artístico, natural e paisaxístico, que se realizarán nos meses de xullo e agosto. Ademais de tres dos guías que conducirán as xeiras, Anxo Rodríguez Lemos, Antonio Soliño Troncoso e Xosé Lois Vilar Pedreira, estiveron presentes os alcaldes de Baiona, Gondomar e Nigrán, Ángel Rodal, Paco Ferreira e Juan González, e os concelleiros de Turismo de Tomiño e Gondomar, Fátima Rodríguez e Xosé Antón Araúxo.
Serán tres xeiras en Baiona -Nosa Señora da Cela, do aviso da súa aparición na Arquiña á actual Igrexa Parroquial; Serra da Groba, a ladeira da Groba; e Monterreal de Baiona: Vivindo entre murallas-, tres en Gondomar -Camiño da Nosa Sra. do Norte. O Portelo-Capela dos Remedios; Camiño da Nosa Sra. do Norte. Capela dos Remedios-Pazo do Conde de Gondomar; e Presentación da toponimia de Peitieiros-, dúas en Nigrán -Ao son das campás de Parada. II Certame de Campás e Campaneiros; e Río de Táboas- e catro en Tomiño -Arquitectura militar histórica. Fortalezas; Camiño de Nosa Sra. do Norte. Os Liñares, Estás, O Mosteiro; Ouro, mámoas e estrelas; e Monte Tetón-.
Tamén están previstas outras dúas xeiras nocturnas, unha polo mar de Panxón e a outra polos petróglifos de Auga da Laxe, aínda sen data.
A duración media das xeiras, que comezarán o próximo martes 3 de xullo, é de 3:00 a 3:30 horas. Como novidade este ano incorpóranse a todas as xeiras dous intérpretes en lingua de signos, o que favorecerá a integración deste colectivo e o seu achegamento ao patrimonio do Val Miñor e Baixo Miño. Héctor Heinzen, da Organización de Xordos de Galicia (Xoga), agradeceu e felicitou aos organizadores pola iniciativa. “Oxalá as persoas xordas, hipoacúsicas, con implante ou xordocegos, veñan a facer turismo aquí e a coñecer a historia”.
