Máis de medio centenar de velas encherán este fin de semana a baía de Baiona para despedir a tempada 2017-2018 da Escola de Vela do Monte Real Club de Yates, que pon o punto e final da etapa coa celebración do Trofeo Baitra.
Conclúen así máis de dez meses de actividade nas que participaron, desde o pasado mes de setembro, preto de 150 alumnos, nos cursos de vela lixeira, cruceiro e adaptada para persoas con discapacidade que o histórico club baionés organiza nas súas instalacións.
Coa chegada do bo tempo e as vacacións, o Monte Real prepárase xa para recibir ás 400 persoas que se espera participen nas actividades estivais do club. Coa chegada do verán as cifras multiplícanse e a programación amplíase tanto en horario como en propostas.
Vela lixeira e cruceiro, cursos de mañá e de tarde para nenos e maiores, escapadas ás Illas Cíes, seráns en veleiro e prácticas de navegación nocturna son algunhas das propostas para aprender a navegar deseñadas baixo a premisa de “Vela para todos e a todos os niveis”. Ese é o principal obxectivo dun programa formativo e lúdico que coordina, desde hai anos, Carlos Rúa.
Adestrador da escola desde o 2009 e responsable da mesma desde o 2013, Rúa ten moi clara a dirección para seguir, unha folla de ruta que pasa por desmitificar a idea de que a vela, polo menos no que se refire a cursos, é un deporte caro, e facela extensible a todo aquel que queira practicala, independentemente da súa idade ou condición.
“Desde o club ofrecemos a todos, sexan nenos ou maiores, saiban ou non navegar, teñan ou non discapacidades, a posibilidade de penetrarse no mundo da vela porque temos a certeza –di Carlos Rúa- de que, unha vez coñézano, acabarán sentindo por este deporte a mesma paixón que nós”.
Aos que queiran “contaxiarse”, Rúa convídalles a ver as regatas deste fin de semana en Baiona, onde navegarán nenos e nenas desde os 7 anos de idade. As xornadas regateiras enmarcadas no Trofeo Baitra, co que se despide a tempada da Escola de Vela celebraranse na baía de Baiona o sábado a partir das doce do mediodía e o domingo desde as once.
