O Grupo Municipal de Manifesto Miñor asegura nun comunicado ter coñecemento de que a Consellería de Sanidade da Xunta de Galicia, por medio do Servizo Galego de Saúde, ten a intención de pechar polas tardes as consultas do Centro de Saúde de Gondomar, ao non ter a intención de substituír o persoal sanitario e on sanitario que atende polas tardes durante o período vacacional nos meses de verán.
“Sen dúbida isto vai causar importantes prexuízos a moitas persoas que teñen organizada a súa vida, traballos, etc, contando con este servizo polas tardes. Obviamente, as persoas usuarias dos servizos de tarde pasarán a engrosar as axendas dos profesionais que exercen pola mañá, coa conseguinte saturación ou colapso do servizo. A maiores, isto vai provocar á súa vez a saturación ao PAC da Xunqueira, ou mesmo dos servizos de urxencias hospitalarias propiamente ditas”, sinala Rocío Cambra.
Para Manifesto Miñor, non se entende a postura do SERGAS cando o Concello de Gondomar na tempada de verán aumenta considerablemente a súa poboación, e en consecuencia, o número de persoas desprazadas que pasan a ser usuarias do Centro de Saúde, é dicir, aumentando saturación xa existente.
A responsable da área de Sanidade do goberno municipal presentará unha moción ao pleno de xuño do vindeiro mércores día 14 na que propón rexeitar a proposta da Consellería de Sanidade e do SERGAS de suprimir o servizo de atención médica polas tardes no Centro de Saúde de Gondomar, así como lle reclamar que manteña aberto co persoal que lle cómpre, o servizo de atención médica polas tardes, e que proceda á substitución sen máis demora de todo o persoal sanitario e non sanitario durante o período vacacional que exercen no Centro de Saúde.
