A polémica reavívase no porto de Baiona pero nesta ocasión entre os pescadores deportivos que acoden todas as noites á zona e o adxudicatario da Estación Marítima. Aseguran que o hostaleiro é o culpable de que axentes da Garda Civil acudan ao peirao para identificar a aqueles que pescan na contorna acoutada do porto, aínda que polo momento sen sancións. A situación está en coñecemento de Portos de Galicia e Concello, que trata de chegar a un consenso colectivo.
Pola súa banda desde Portos admitiron ter coñecemento dun problema relacionado con actos vandálicos polo que decidiron intensificar a vixilancia en horario diúrno, pero que a partir das 18 horas a seguridade no perímetro pasa a ser competencia do Instituto Armado que se limita a identificar aos que practican a actividade deportiva na zona prohibida.
O conflito foi aumentando ata o punto de que algúns usuarios que van ao porto baionés a soltar as súas sedelas decidiron levalo a redes sociais. Neste momento o problema inicial desvirtuouse pasando a unha serie de descualificacións e ataques ao adxudicatario. Con afán de buscar un entendemento, e ante a magnitude que estaba a alcanzar o problema, desde o establecemento optaron por publicar un escrito no que explican que os motivos da discordia, segundo aseguraron todo xira ao redor dun grupo minoritario de pescadores que se comporta de maneira incívica invadindo o espazo dedicado a explotación hostaleira como terraza. Manteñen que ademais de deixar todo infestado de sucidade, un feito constatado por fontes próximas ás instalacións marítimas, en ocasións os clientes do establecemento sufriron ameazas por parte dos pescadores no momento que foron recriminados pola súa actitude. No documento quixeron deixar claro que en ningún momento buscan que se sancione aos que pescan no porto xa que a relación con eles é boa e moitos son clientes do local, pero esixen que se respecte a súa zona de explotación para que non interfira na súa actividade.
Ao mesmo tempo o alcalde Ángel Rodal, tamén afirmou ter coñecemento da problemática despois de recibir queixas de varios veciños e que mesmo o trasladou ao presidente do organismo, José Juan Durán. En canto á polémica entre os pescadores deportivos coa Estación Marítima, o rexedor afirmou que non vai entrar en discusións xa que o adxudicatario débese aos pregos de Portos e que cada parte ten que velar por cumprir as súas obrigacións, pero tamén os seus dereitos. “Eu aposto por un entendemento entre eles pero ten que ser o organismo dependente da Xunta quen medie na situación”, explicou.
Fai sete anos o porto da Coruña atopouse ante un conflito similar ao que acontece en Baiona, tanto desde o goberno local como desde o organismo dependente da Xunta optaron por acoutar zonas de pesca deportiva para que non haxa interferencias.
