O Monte Real Club de Yates volverá organizar, un ano máis, o Campionato Galego de Solitarios e a Dous, que se celebrará o vindeiro sábado en augas das Rías Baixas patrocinado por Inserimos Enerxía e dedicado ao que foi presidente do club durante máis de 40 anos, Don Rafael Olmedo Limeses.
Este é o sétimo ano consecutivo no que a Real Federación Galega de Vela confíalle ao club baionés a organización dunha das regatas máis emocionantes e complicadas da tempada náutica en Galicia polas súas esixencias de navegación, xa que os veleiros participantes unicamente poden levar a bordo a un máximo de dous regatistas.
Reducidas ao máximo para ocuparse da estratexia e as manobras, as tripulacións disputaranse un percorrido de ida e volta, de entre 25 e 35 millas, entre a baía de Baiona e o Faro de Camouco, na illa de Ons. Aínda que o trazado final definirase en base ás condicións meteorolóxicas da xornada, as balizas de Carallones e A Negra, e o illote dos Viños, no arquipélago das Illas Cíes, serán previsiblemente pasos obrigados para a frota.
Entre os participantes xa confirmados estarán os vixentes campións, Jean Claude Sarrade e André Amorín, que tratarán de revalidar o título a bordo do Fend la Bise do Monte Real Club de Yates. Polo club organizador tamén regatearán Fernando Yáñez e Ignacio Sánchez Otaegui a bordo do Cansino, Willy Caamaño e Juan José Lago no Virazón, Juan Luis Tuero e Rogelio Torres no Luna Nueva, e Luis de Mira e Javier Torroja no Namasté, entre outros.
O Real Club Náutico de Portosín estará representado polo Clínicas Gaias de José María Peinó, o Club Náutico Castrelo de Miño pola Burla Negra de Juan José Martínez, e o Liceo Marítimo de Bouzas polo Smaku de Alfonso Rodríguez. Do Real Club Náutico de Vigo xa se inscribiron para participar o Salaño Dos de Jacobo Vecino e Brenda Maure, e El Juliana by Deep Blue de Vicente Cid e Javier Míguez.
A competición dará comezo ás 11 da mañá do próximo sábado 2 de xuño na baía de Baiona, desde onde o comité de regata, que presidirá un ano máis Fernando Giraldo, dará o bocinazo de saída para a costeira. O Campionato Galego de Solitarios e A Dous finalizará coa entrega de premios aos gañadores, ese mesmo sábado ás nove da noite, nas instalacións do Monte Real Club de Yates.
Ademais de disputarse o título autonómico, o Trofeo Inserimos e a Copa do IV Memorial Rafael Olmedo, os participantes puntuarán para o Circuíto Rías Baixas de A Dous, unha nova competición creada este mesmo ano polo Monte Real, o Real Club Náutico de Portosín, o Náutico de Portonovo e o Liceo Marítimo de Bouzas. A última proba puntuable deste circuíto foi a Regata Volta ás Cíes, que se celebrou o pasado fin de semana con vitoria do Menudetta de Víctor Carrión e Ana Sardiña.
