Anuncios
Ticker de novas

Mila López proclámase subcampioa de España de ciclismo adaptado

Milagros López Vernet proclamouse este fin de semana subcampioa de España de Ciclismo Adaptado na localidade burgalesa de Villadiego. O sábado, a deportista baionesa foi segunda na proba contrarreloxo, completando o trazado de 23 quilómetros en 55:28. Na xornada matinal do domingo, repetiu posto na proba en liña, cun circuíto de 23 quilómetros co perfil máis esixente xamais exposto nunha cita deste tipo, que Mila afrontou en 1:02:20.

“Un circuíto duro e tamén do máis bonito de todos os que corrín”, comentou a baionesa, que ademais destaca a “moi boa organización, sinalización e traballo dos voluntarios”. A próxima cita será a seguinte proba da Copa de España, que se celebrará en Cheste o 14 de xullo.

Ademais, a Selección de Galicia da que formaba parte Mila alzouse o venres co 4º posto na proba de substitucións por equipos, que se desenvolveu nun circuíto urbano de 2,1 quilómetros polas rúas máis representativas e históricas do bonito municipio de Villadiego. “Para min coma se fose un primeiro posto, a miña primeira carreira facendo equipo cos compañeiros galegos e baixo unha carpa e bandeira na que sobran ganas e humor. Un circuíto moi rápido, algún que outro patinazo nalgunha curva co asfalto mollado e un grupo de raparigos animando a Galicia”, lembra a baionesa.

En total, foron 125 ciclistas os que tomaron parte no Campionato de España de Ciclismo Adaptado, máis que en ningunha edición anterior, entre os que merece unha especial recensión o notable aumento do número de mulleres participantes. Ademais, Villadiego puxo a disposición do nacional de paraciclismo uns inmellorables trazados, tanto para as probas de crono como para a ruta, que permitiron despregar todas as súas capacidades aos competidores.

Anuncios