A Fundación Provincial Banco de Alimentos de Vigo mobilizará este fin de semana a uns 260 voluntarios para participar na campaña “Mayo Solidario” organizada por Gadis nun total de 13 supermercados de Vigo e A Ramallosa. A recollida de comida se levará a cabo mañá, venres, e o sábado, 25 e 26 de maio, durante o horario comercial de cada centro.
Gadis repite o seu cada vez máis consolidado #MayoSolidario no marco do seu programa de responsabilidade social corporativa e, por segundo ano consecutivo, voluntarios da ONG colaborarán coa súa presenza nesta acción. Cada un deles regalará, polo menos, catro horas do seu tempo a favor das persoas máis desfavorecidas.
Á vez que esta Operación Quilo do Banco de Alimentos desenvólvese en distintos establecementos de Vigo e A Ramallosa, se levará a cabo tamén en Pontevedra e Vilagarcía, así como noutras localidades de Galicia e Castela e León.
Gadis impulsa o #MayoSolidario desde 2013 en numerosos supermercados de Galicia e Castela e León. A maiores das doazóns que a cidadanía poida realizar durante a campaña, o grupo empresarial comprométese a incrementar a cantidade de alimentos que, finalmente, entregarán aos Bancos de Alimentos adheridos á campaña, entre os que se atopa o de Vigo. Neste sentido, Gadis confía en superar os preto de 163.000 quilos de comida entregados durante a última edición a eses 12 Bancos de Alimentos.
A entidade provincial necesita, sobre todo, produtos básicos como aceite, galletas, cacao, leite e todo tipo de conservas. Con todo, e como sempre, calquera doazón é benvida.
2017, en cifras
Durante 2017, a Fundación Provincial Banco de Alimentos de Vigo repartiu 1,9 millóns de quilos de comida (1.896.676 quilos). A entidade apolítica e aconfesional dedica os seus esforzos a facer cumprir un dos dereitos humanos máis fundamentais: o acceso a unha alimentación suficiente, segura e saudable.
Na actualidade, entrega axuda a uns 150 colectivos sociais que, á súa vez, distribúena a unhas 25.000 persoas con dificultades na provincia.
