Anuncios
Ticker de novas

Sorprendidos in fraganti dous veciños do Porriño roubando no punto limpo de Vincios

A Garda Civil investiga penalmente a dous veciños do Porriño que foron sorprendidos in fraganti cando estaban a roubar no punto limpo da Pasaxe, situado na parroquia de Vincios (Gondomar).

Os feitos sucederon a última hora da tarde do pasado luns no marco dun operativo especial que tiña establecido o Posto da Garda Civil de Gondomar ao redor deste punto limpo, por mor doutros dous roubos que se produciron durante os tres últimos meses.

As vixilancias esporádicas que se estaban realizando, con controis e observacións discretas a diferentes horas do día, deron resultado cando o pasado luns, ás 21:15 horas, detéctanse a dous individuos no interior do punto limpo, seleccionando e empaquetando material para sacalo ao exterior e cargalo nun turismo que tiñan estacionado nas inmediacións do recinto.

Cando emprendían a marcha co maleteiro do vehículo cargado, foron interceptados polo operativo que pechaba as vías de saída, que estaba integrado por unha patrulla do Posto da Garda Civil de Gondomar e dous efectivos da Policía Local.

Ao inspeccionar o vehículo púidose comprobar que, entre os efectos que subtraeran no interior do recinto pechado do punto limpo, figuraba: unha escaleira de ferro, unha cociña de gas, unha xanela de aluminio, tubaxes de cobre, chapas metálicas, cables e compoñentes electrónicos.

Os dous ocupantes do vehículo, J.S.F., e JA.F.B., ambos de 36 anos e veciños do Porriño, foron investigados penalmente como supostos autores deste delito de roubo e atribúeselles, tamén, a comisión dos dous últimos cometidos o mes de febreiro e abril deste ano.

A investigación continúa aberta para determinar a súa posible participación noutros feitos delituosos de similares características.

As dilixencias instruídas foron entregadas no Xulgado de Instrución de garda de Vigo, onde deberán comparecer os investigados cando sexan citados.

2018-05-17 - tumblr_inline_p8uffuJd4b1v3fntx_1280

Anuncios