Anuncios
Ticker de novas

Primeira aventura internacional do Kincar de Joaquín Chamorro fabricado en Nigrán

Esta semana o equipo de Kincar con Joaquín Chamorro á cabeza desprazouse ata Solleftëa, en territorio sueco, para levar as dúas primeiras unidades do modelo de carcross Kincar en versión Nordik Edition ao seu distribuidor sueco, Minhoj Racing.

O distribuidor sueco de Kincar, co seu propietario Niklas Hedström á cabeza, organizou unha xornada de test no circuíto de carcross da súa propiedade que conta cunhas fabulosas instalacións con varios circuítos offroad dedicados a quad, motos e coches.

Varios pilotos suecos de disciplinas tan diferentes como os quad, rallyes e mesmo pilotos de motos de velocidade foron os invitados para coñecer o Kincar Nordic Edition podendo espremerlle ao máximo dado o fabuloso estado no que se atopaba a instalación, que fixo da xornada un día espectacular e moi proveitoso.

Todos os pilotos encomiaron a facilidade de condución do Kincar, o que lles permitía ir a un moi alto ritmo desde a primeira volta cun coche que nunca probaran e nunha modalidade que nunca practicaran, dado que algún deles nin sequera vira antes un carcross en persoa.

O equipo de Kincar, pola súa banda, quedou fascinado co talento innato de todos eles mostrando unhas calidades e técnica excepcionais para a condución de competición. “Alucinado quedei con estes señores, montaron dez persoas diferentes no coche, non conduciran ningún carcross e ían todos rapidísimos desde a primeira volta. Varios deles demostráronme especialmente unhas posibilidades altísimas. Niklas ten á súa disposición un bo número de pilotos capaces de facer un bo papel no campionato sueco desde o primeiro día”, dicía Joaquín Chamorro ao concluír a xornada de test.

Pola súa banda Hedström encomiaba a robustez, calidade e altísima eficacia que puido apreciar no Kincar. “Cando Kincar propúxome organizar unha xornada de test en lugar de enviarme por barco os coches aceptei sen dubidalo, porque coa colaboración dos creadores do Kincar puidemos adiantar nun ano a nosa adaptación á condución do vehículo. Agradezo enormemente o esforzo que tiveron que facer tanto Joaquín Chamorro como Fernando Viadero para facer os máis de 4000km que nos separan de España, dado que sen a súa colaboración seguramente estariamos moi perdidos. Durante todo o día estiveron os dous moi pendentes de todos nós, dándonos valiosísimos consellos de condución para poder sacar o máximo partido a este tipo de vehículos. Ademais, puidemos gozar de ver a Joaquín facendo unha quenda co coche, o que nos permitiu sacar referencias e ver de que é capaz o Kincar. Agora temos moi claro cal é o rumbo para tomar e que facer para poñernos rapidamente a disputar o campionato Sueco de Autocrós. Doutra banda, montamos a máis de 10 pilotos sen descanso durante todo o día de hoxe, con dúas saídas de pista incluídas e puidemos comprobar que o Kincar está fabulosamente construído porque non se moveu nin un só parafuso. Só nos tivemos que ocupar de botarlle gasolina. Despois de hoxe, e vendo que nun só día de test xa podemos ir rápido co Kincar, imos adiantar bastante os nosos plans de participar no Campionato Sueco de Autocrós”.

Ademais de dúas unidades de Kincar Nordik Edition, Kincar entregou onte a Minhoj o despezamento de practicamente coche e medio en recambios e compoñentes para que Minhoj poida atender coa celeridade e calidade de servizo necesarios a calquera necesidade dos pilotos Kincar de maneira local.

Tras a xornada de onte, Niklas Hedström xa anunciou que vai necesitar máis unidades rapidamente do Kincar Nordik Edition e ambas as dúas empresas están a coordinar a fabricación da seguinte remesa de vehículos.

Paso importante o dado por Kincar na evolución dun proxecto que cada vez está a cobrar maior protagonismo e tamaño.

Anuncios