Catro grandes eventos náuticos para continuar coa celebración do 525 aniversario da Arribada

FOTO: ALBERTO RODRÍGUEZ // Presentación dos eventos náuticos do 525 aniversario da Arribada.

O protagonismo histórico chegoulle á Real Vila de Baiona por mar hai 525 anos cando a Carabela Pinta arribou á súa costa coa noticia do descubrimento dun novo mundo, por iso a Concellería de Actividades Marítimas, dirixida por Raúl Costas, preparou un completo programa de actividades marítimas para reforzar o vínculo do mar e o da Vila e continuar coa celebración do 525 aniversario da Arribada da Carabela Pinta.

Durante os próximos meses Baiona converterase na capital dos deportes náuticos pois a axenda estará marcada por importantes competicións e eventos. En todas as probas a organización fará unha homenaxe á Arribada da Carabela Pinta á praia da Ribeira ou na Baía da Vila con motivo do 525 aniversario da chegada de Martín Alonso Pinzón e os seus tripulantes coa noticia do descubrimento de América en 1493.

O primeiro deles terá lugar este mesmo fin de semana, a Regata 525 Aniversario da Arribada da Carabela Pinta. As probas, nas que participarán en exclusiva barcos da clase 6m, tanto na súa versión clásica como moderna, celebraranse no interior da baía de Baiona, moi preto da costa, co obxectivo de que todo aquel que o desexe poida gozar coa beleza da navegación destes veleiros.

Xa no mes de xullo, as traiñeiras volverán a Baiona despois de 30 anos, sendo outra desas citas marcadas con vermello no calendario da localidade. Disputarase o sábado 16 de xuño, un día moi esperado debido á súa gran tradición e o encanto de remar na baía. Todas as traiñeiras ansían gañar a regata e ondear a bandeira en augas baionesas. A Concellería de Actividades Marítimas aposta por traer de novo a Baiona esta regata tradicional para volver ás raíces mariñeiras do lugar, xa que se trata da competición máis tradicional de todas pois a orixe das regatas de traiñeiras debemos atopalo, como non podía ser doutra maneira, no mar, e máis concretamente na actividade pesqueira. A regata de Baiona será a máis importante da liga galega de traiñeiras, na que despois de case un ano, os equipos volven atopar para medir forzas na competición. Asistirán todos os equipos, os da liga A (12 equipos), a liga B (9 equipos) e a liga feminina (5 equipos), en total 26 equipos, coas súas 26 traiñeiras e as súas máis de 550 deportistas máis o persoal técnico, adestradores, delegados, presidentes…

O 8 de setembro terá lugar a celebración da primeira proba da segunda edición da Triple Corona Illas Atlánticas entre as Illas Cíes e Baiona, cunha distancia de 15 km. Máis de 160 nadadores de distintos puntos de España, Portugal e Arxentina participarán na travesía, que se consolidou como unha das probas máis importantes a nivel nacional. Os nadadores divididos en cinco grupos sairán desde a praia de Rodas, nas Illas Cíes, e percorrerán o 15 km ata chegar á praia da Ribeira, en Baiona. Os obxectivos deste reto son poñer en valor a riqueza natural das Illas Atlánticas, promocionar as Rías Baixas e Baiona e converter este desafío deportivo nunha das probas de natación de referencia en España e Europa. No caso da edición de 2018, a organización fará unha homenaxe á Arribada da Carabela Pinta.

O broche final á programación terá lugar o 28 e o 29 de setembro co Campionato de España Absoluto de Stand Up Pádel (Paddlesurf) onde se decidirán os Campións de España de todas as categorías (desde 10 ata 50 anos) e o que servirá como clasificatorio para conformar a Selección Española que acudirá ao Mundial en Brasil dous meses máis tarde. Este evento está organizado polo Club Galego de Surf dentro do proxecto «Produto Turístico SUP» financiado polo Fondo Europeo Marítimo e de Pesca a través do Grupo de Acción Local do Sector Pesqueiro (GALP) Ría de Vigo – A Guarda.

O Campionato de España de Stand Up Pádel é un evento de natureza itinerante pero que neste caso sen precedentes decidiron, desde a Federación Española de Surf, que se organizase durante 4 anos consecutivos na baía de Baiona, polas perfectas condicións que ofrece para a realización deste evento e pola garantía que ofrece este enclave para que o Campionato salga adiante independentemente das condicións climatolóxicas, xa que a organización conta con ata 3 percorridos alternativos para adaptar o evento á climatoloxía.

Na presentación oficial das actividades, celebrada esta mañá nos Xardíns da Casa da Navegación, o Alcalde de Baiona, Ángel Rodal, felicitou ao Concelleiro de Actividades Marítimas por conseguir que todas estas probas celébrense na Vila e mostrouse “moi orgulloso de que Baiona acolla todas estas competicións e eventos náuticos que poñerán en valor un recurso moi valioso, amante e que nos define, como é o noso mar», e por «consolidar a localidade», a través do seu traballo, como «o símbolo da deportes vinculados co mar”.

O Concelleiro de Actividades Marítimas, Raúl Costas, incidiu na estreita colaboración do Concello de Baiona cos diferentes organizadores, co obxectivo de “facer da nosa vila un lugar único onde gozar dos deportes náuticos, para gozar do mar, para visitar, reforzando o noso vínculo co océano e as nosas raíces mariñeiras”.

“Baiona é unha Vila atlántica, rodeada e marcada polo mar, porque vive e convive con el a través do seu porto, dos seus mercados, das súas praias, da súa gastronomía e tamén, coa aposta por este tipo de eventos da actividade de lecer ou deportiva», concluíu o Alcalde.

Na rolda de prensa tamén interviñeron Carlos Rúa, Coordinador da Escola de Vela do Monte Real Club de Yates, Melchor Gago, Presidente da Asociación Liga Noroeste de Traiñeiras, Beatriz Alvariño, responsable da organización da Triple Corona Illas Atlánticas, Coque Araújo, Vicepresidente do Club Galego de Surf, e Ignacio López-Chávez, Delegado da Xunta de Galicia en Vigo. Estivo tamén presente a concelleira de Cultura de Baiona, María Iglesias, encargada da organización dos actos vinculados co 525 aniversario da Arribada da Carabela Pinta, e Daniel Benavides, xefe provincial do servizo de deportes da Xunta de Galicia.

Anuncios