Promover a reflexión sobre as fronteiras e a situación das persoas refuxiadas é a finalidade do espectáculo teatral “O valo”, creado o ano pasado por Pallasos en Rebeldía para o Fondo Galego de Cooperación e Solidariedade e que esta fin de semana inicia una nova xira en Nigrán, concello que ostenta a Presidencia da entidade na figura do alcalde, Juan González. Será o sábado 21 de abril, ás 19:00 horas no Auditorio Municipal, no marco do “Mes do Libro” que celebra en abril o Concello de Nigrán e está dirixida a un público familiar (ideal de 8 anos en diante). A representación dará comezo ás 19:00 horas, pero xa pola mañá, ás 12:00 do mediodía, terá lugar un contacontos na Praza do Concello a cargo do escritor de literatura infantil Miguel Ángel Alonso Diz.
Baseada no texto homónimo que recibiu o Premio Manuel María de Literatura Dramática Infantil, o obxectivo da obra é evitar o esquecemento das guerras e da xente que delas foxen, ao tempo que se convida a transformar a realidade pensando un mundo diferente. A proposta representa o encontro entre unha nena que escapa da guerra e un rapaz soldado, gardián devoto de fronteiras móbiles. Cómpre ter en conta que o conflito en Siria obrigou a máis de cinco millóns de persoas a abandonar o país na procura de refuxio noutros lugares, entre as que se achan moitas menores. “O valo” está escrita en homenaxe a todas elas, para que as teñamos presentes e as súas vidas constitúan o xerme da loita contra todos os valados, muros e fronteiras que separan os seres humanos.
Nigrán, Cambados, Barro, Silleda, Bergondo, Fene, Pontedeume, Valga, Verín, Oleiros e Burela son os municipios socios do Fondo Galego de Cooperación e Solidariedade que acollerán antes de finais de ano esta actuación, cofinanciada pola Xunta de Galicia. Pallasos en Rebeldía defínese coma un espazo do teatro galego para traballar a cooperación internacional a través da risa. Xurdida nunha visita a Chiapas en 2004, considera que o clown desenvolve unha función protectora de valores sociais como a crítica, o dereito a rir que tamén teñen as persoas máis desfavorecidas ou a superación dos nosos complexos mediante a cura da gargallada.
O Fondo Galego de Cooperación
O Fondo Galego de Cooperación e Solidariedade está integrado por 94 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en preto de 30 países e promove numerosas actividades e materiais en relación aos desequilibrios Norte-Sur. Recoñecido como axencia municipal da cooperación galega, o Fondo Galego de Cooperación e Solidariedade celebrou en 2017 o seu vixésimo aniversario.
