Un cento de maiores participa hoxe na excursión a Pontevedra organizada polo Concello de Nigrán dentro do seu programa de turismo social destinado á veciñanza da terceira idade. Os asistentes saíron en autobús ás 9:00 horas dende o Concello para primeiro visitar a sede da Deputación de Pontevedra e posteriormente percorrer o casco vello desta cidade nunha ruta guiada, trasladándose a continuación a Redondela para unha comida-baile no Restaurante Casas.
O Goberno local de Nigrán entende que viaxar «non só serve para descubrir lugares novos, senón que apórtanos moítisimos beneficios especialmente útiles para as persoas maiores, como a mellora do ánimo, aumento da creatividade, mellora da capacidade de resolver problemas, estimulación da actividade cerebral e reconstituínte da memoria e da atención».
Nese sentido, o alcalde de Nigrán, Juan González, deixa clara a súa aposta por este programa, «porque a todos estes beneficios hai que engadir que se socializarán e, en definitiva, faraos sentir máis felices e vitais”.
