A delegada do Consorcio da Zona Franca de Vigo, Teresa Pedrosa, e o alcalde de Baiona, Ángel Rodal, visitaron este xoves as instalacións do viveiro de empresas, na emblemática Casa do Reloxo, edificio rehabilitado en 2016 e que hoxe xa se converteu en sede de novos negocios.
Teresa Pedrosa e Ángel Rodal realizaron un percorrido polo rehabilitado edificio para coñecer de primeira man aos emprendedores instalados durante os últimos meses e que xa desenvolven o seu plan de negocio desde Baiona. Coas últimas incorporacións xa se cubriron o total das oficinas ofertadas por Zona Franca.
A delegada e o rexedor destacaron os servizos que ofrece este viveiro para todos aqueles que desexan iniciar o seu proxecto empresarial. «A Casa do Reloxo xa é un referente do emprendemento, un centro capaz de propulsar novos negocios que diversifican e melloran o noso tecido empresarial, polo que estamos moi agradecidos pola forte aposta realizada desde o Consorcio da Zona Franca», afirmou Ángel Rodal.
Pedrosa e Rodal destacaron as vantaxes do coworking e animaron aos emprendedores a traballar desde estes espazos compartidos xa que esta modalidade de traballo pode ser moi atractiva para todos aqueles que na época estival teñen a súa segunda residencia na Vila e que aquí poderán alugar un posto de traballo por un breve período de tempo para facer as súas xestións empresariais.
Este viveiro de empresas está situado na Casa do Reloxo, un edificio histórico rehabilitado polo Consorcio da Zona Franca en Vigo, realizado con fondos FEDER canalizados a través da Fundación Incyde, dispón de seis oficinas -hoxe todas ocupadas- e 38 postos de traballo nun espazo común, salas de reunións e servizos de técnicos de apoio para a creación de empresas.
Os “viveiristas”
Na oficina número 1 atópase Sacodoceo, unha sociedade que realiza xestión patrimonial, así como a promoción turística e sociocultural do Val Miñor principalmente… e a colaboración coa “Fundación Traslatio 2021”.
Na número 2 sitúase English Resource Centre, unha empresa que se dedica a servizos de inglés, traducións, cursos, conversacións, clases particulares, eventos, circuítos, promoción e contido web, proof-reading, vídeos de márketing, impulso do Camiño Portugués da Costa, axuda e xeración de negocio e emprego…
Na número 3 está o Gabinete de Arquitectura Rosa Mouriño, dedicado á arquitectura, urbanismo, deseño e rehabilitación.
A oficina número 4 é a sede de Summum Delicatessen, dedicada á comercialización de produtos galegos, elaborados de forma tradicional, pero tamén innovadores, a partir da inigualable materia prima que as nosas rías e terra ofrécennos. O seu target son establecementos Gourmet/Delicatesen, alta restauración, cátering e empresas de todos os sectores que realizan eventos e agasallos ao longo do ano e especialmente en campaña de Nadal.
Na oficina número 5 está instalada a startup Bonos Bienestar, que combina experiencias en hoteis spa, balnearios e centros de talasoterapia en forma de bonos-regalo con data aberta.
Por último, a número 6, está ocupada por 805 estudio, dedicado ao deseño gráfico, un estudo multidisciplinar que enfoca o seu traballo no deseño de produto (recordos) ademais de ofertar proxectos de branding integral. As súas bases son fundamentalmente dúas: o Camiño Portugués pola Costa (o seu paso por Baiona) e a idea de proxectar Baiona e o Val Miñor ao resto do mundo. Ocúpanse dunha revisión do deseño de recordos para achegar frescura, orixinalidade e actualidade. Tamén poñen en valor diferentes lugares e recunchos da zona. Cada emprazamento ten as súas peculiaridades e costumes, factores que converte en obxectos de deseño para o recordo.
Nun dos espazos dedicados ao coworking está instalada unha empresa de software.
