A Garda Civil investiga a aparición en Gondomar de varias trampas con cravos, das que adoitan utilizarse como medida disuasoria para impedir o tránsito de vehículos polo monte, fundamentalmente bicicletas e motos.
Por mor dunha alerta cidadá, a Patrulla do Seprona (Servizo de Protección da Natureza) do Porriño puido localizar tres destas trampas nun monte da parroquia de Vincios, en Figueiro, no termo municipal de Gondomar.
Trátase de tres dispositivos metálicos provistos de cravos, con dous vástagos pola súa banda inferior para facilitar e asegurar a súa ancoraxe e suxeición no terreo. Os tres estaban colocados e disimulados con maleza sobre o carreiro que discorre por un terreo forestal que, aínda que está cercado, ten un acceso practicable.
Os tres obxectos foron retirados polo Seprona. Ao mesmo tempo iníciase unha investigación para coñecer as circunstancias, a suposta intencionalidade na colocación destas trampas e a identidade do presunto autor, todo iso co obxecto de dirimir posibles responsabilidades penais polo perigoso risco potencial que supoñen estes feitos para a integridade física das persoas que poden transitar por este camiño.
