No partidazo celebrado esta xornada en Gondomar entre o Vincios e o San Sebastián de los Reyes acabou cunha axustada vitoria do equipo local, que o leva ata cuarta praza da clasificación xeral da Superdivisión Española do Tenis de Mesa, situándoo en prazas europeas. Tal como prevíase, o encontro foi moi disputado, decantándose a vitoria do cadro gondomareño tras o derradeiro partido por 4-2. Tras o sorteo, o encontro comezou co enfrontamento dos números un de cada equipo, polo cadro local o internacional portugués Diogo Silva e polo Sanse o internacional español Carlos Franco, encontro que caeu do lado do cadro local por 3-1. No segundo encontro igualouse a contenda tras un rifado partido entre Martín Pintos e o xogador portoriqueño do Sanse Daniel González Negrón, que con parciais de 14-12, 12-14, 8-11 e 9-11 decantouse por 1-3 ao lado visitante. O momentáneo empate o desfixo o xogador local Moisés Álvarez ao vencer por 3-0 ao xogador Carlos Caballero, internacional sub 21 español convocado pola selección española para disputar a semana que vén o Campionato de Europa sub 21 en Minsk, Bielorrusia.
Tras chegar ao ecuador do encontro con 2-1 a favor do Vincios, o Sanse logrou igualar novamente a contenda ao vencer Carlos Franco a Martín Pintos por 3-0. No seguinte partido Diogo Silva venceu igualmente a Carlos Caballero por 3-0, deixando para o último partido entre Moisés Álvarez e Daniel Álvarez a posibilidade do empate ou a vitoria final do Vincios. O encontro foi moi disputado, estando sempre Daniel por diante no marcador en todos e cada un dos sets, pero a gran capacidade de sufrimento e loita de Moisés xunto ao empuxe da afección, logrou que remontase tres deles, acabando o encontro 3-1 ao seu favor, con parciais de 5-11, 11-9, 12-10 e 13-11.
Con estas dúas últimas vitorias do Vincios consolídase nos postos altos da clasificación, á espera dos restantes resultados da xornada.
