O vigués Miguel Lago liderou á tripulación do Virazón ao máis alto da clasificación do Trofeo Infinitus Rent, que viviu este sábado na baía baionesa a súa segunda xornada de probas.
Cun cuarto posto e un primeiro nas dúas regatas disputadas esta tarde, o Virazón logrou ascender, con 15 puntos, ata o posto de honra, facendo caer ao Miudo e ao Cansino, que viñan líderes. Os barcos patroneados por Francisca Barros e Fernando Yáñez son agora segundo e terceiro respectivamente, con 16 e 20 puntos.
En cuarta posición, con 21 puntos, atopamos ao Okofen de Javier de la Gándara, que foi, sen dúbida, un dos protagonistas da xornada. Nas dúas mangas celebradas cun vento do norte duns 7 nós de media, asinou un primeiro posto e un segundo, pero a descualificación que sufriu na primeira etapa lastrou o seu ascenso e quedou ás portas do podio provisional.
Na parte media da clasificación situáronse, apenas separados por cinco puntos, o Meltemi de Guillermo Blanco e La Galera de Rosario García, ambos os dous do Real Club Náutico da Coruña; o Luna Nueva de Juan Luis Tuero, o Pazo de Cea de María Campos e o Namasté de Luis de Mira, que hoxe tivo como convidado a bordo o regatista de J70, Ramón Ojea.
Pechan a clasificación do Trofeo Infinitus Rent o Cormorán II de Yago González-Robatto, o Marina Real de Joaquín Cobelo López, o Ferralemes de Enrique Porto, o SND Cormorán de Francisco J. Martínez, o Mondo de Bernardo Macedo e o Marías-Casas do Telhado de Manuel María Cunha.
Coa celebración da segunda das seis xornadas previstas, o Trofeo Infinitus Rent ponse cada vez máis emocionante, tanto pola igualdade que caracteriza á competición dos monotipos J80, idénticos entre si e regateando en tempo real, como pola intensidade que marcan as tripulacións, competindo sempre ao máximo nivel.
A próxima coa Liga de Inverno do Monte Real Club de Yates o 10 de febreiro, a partir das tres da tarde, cun programa de tres regatas barlovento sotavento, de dúas voltas cada un.
CLASIFICACIÓN XERAL (Top5) TROFEO INFINITUS RENT
1. VIRAZÓN • Miguel Lago • Monte Real Club de Yates
2. MIUDO • Francisca Barros • We Do Sailing
3. CANSINO • Fernándo Yáñez • Monte Real Club de Yates
4. OKOFEN • Javier de la Gándara • Monte Real Club de Yates
5. MELTEMI • Guillermo Blanco • Real Club Náutico de A Coruña
