Carlota Corredera, embaixadora do Banco de Alimentos de Vigo para a súa Gran Recollida Solidaria

FOTO: BANCO DE ALIMENTOS DE VIGO // Carlora Corredera no Banco de Alimentos de Vigo.

A xornalista Carlota Corredera converteuse esta mañá na nova embaixadora da Fundación Provincial Banco de Alimentos de Vigo para a Gran Recollida Solidaria (GRS2017), que se celebrará os próximos 1 e 2 de decembro. A viguesa recibiu o peto de voluntaria durante un acto celebrado no almacén de San Pedro de Sárdoma.

Tras a imposición do chaleco a mans do presidente da ONG, Pedro Pereira, e do coordinador da GRS2017, Iván Martínez, Corredera sinalou que “nada me faría máis feliz que ver todos os andeis do Banco de Alimentos a rebentar” o 1 e 2 de decembro, á vez que vaticinou que así será, xa que Vigo e Pontevedra son “terra solidaria” de sempre.

Así mesmo, a presentadora de televisión animou a facerse voluntario e lembrou que só son catro horas do noso tempo para axudar ás persoas que peor o están pasando na actualidade. Precisamente, o Banco de Alimentos segue necesitando a día de hoxe uns 200 voluntarios para poder desenvolver con éxito a súa cita solidaria máis importante. “Que as persoas que poidan regalen catro horas do seu tempo, que son catro horas?”, pediu a xa madriña da ONG.

A imaxe de Corredera e o lema “Segues a cadea?” alagará de carteis numerosas rúas de Vigo e Pontevedra e, acompañará, ademais, aos distintos puntos de recollida de alimentos durante os próximos 1 e 2 de decembro.

Corredera recollerá alimentos o día 2

A coñecida xornalista comprometeuse a estar en Vigo e Pontevedra durante a GRS2017, concretamente, o próximo día 2 e, como unha voluntaria máis, axudará a recoller alimentos nalgún supermercado adherido a esta acción solidaria que, ano tras ano, permite recuperar o stock de comida que logo se reparte entre as persoas con dificultades da provincia.

“Estarei aquí recollendo alimentos o día 2 porque hai que predicar co exemplo” e, ademais lembrou que todos podemos necesitar axuda nalgún momento da nosa vida “eu son unha persoa á que as cousas lle van ben, pero uno non pode esquecer de onde vén”.

O presidente da Fundación Provincial Banco de Alimentos de Vigo agradeceu publicamente o carácter comprometido de Corredera co que a ONG pretende ter unha importante repercusión mediática e mostrouse convencido de que o seu tirón “arrastrará a moitos solidarios para facerse voluntarios e doantes de alimentos”.

Traxectoria profesional de Corredera

Carlota Corredera, xornalista e directora de distintos espazos televisivos de La Fábrica de la Tele, é na actualidade unha das condutoras de Sálvame e presentadora de Cámbiame, ambos os dous programas de Telecinco.

Licenciada en xornalismo pola Universidade de Santiago de Compostela, iniciou a súa andaina profesional en Antena 3 cadea na que chegou a ser subdirectora de Sabor a ti en 2003. Despois foi fichada por Telecinco para dirixir distintos programas, os máis relevantes Sálvame e Sálvame Deluxe en 2009. A partir de 2014 comeza a ser unha das presentadoras de Sálvame e desde principios deste ano conduce Cámbiame. Tamén é autora do libro “Tú también puedes: Cómo conseguí perder 60 kilos y ganar e salud”, da editorial Grijalbo.

O seu carácter solidario levouna a viaxar ata Anantapur (India) onde mulleres da Fundación Vicente Ferrer confeccionaron tradicionais saris para os colaboradores de Sálvame, logrando, á súa vez, unha avalancha de novos apadriñamentos e socios apoiando dita causa. Outra das súas innumerables causas que abandeira é Nico Contra o Cancro Infantil, entidade ourensá sen ánimo de lucro.

Os antecesores de Corredera como embaixadores do Banco de Alimentos foron Fernando González, Gonzo, (GRS2016), María Castro (GRS2015), Luís Tosar (GRS2014) e Borja Oubiña (GRS2013).

GRS2017, en cifras

Os próximos 1 e 2 de decembro, o Banco de Alimentos mobilizará a uns 2.000 voluntarios polos 155 hipermercados de Vigo e Pontevedra, así como das comarcas do Morrazo, Val Miñor, Baixo Miño, O Salnés ou Deza. O obxectivo da GRS2017 é igualar o éxito alcanzado durante a edición pasada cando se recibiron ao redor de 310.000 quilos de alimentos e, así poder seguir axudando ás 25.000 persoas desfavorecidas ás que chega na provincia, a través dos 150 colectivos sociais cos que traballa.

Para ser voluntario do Banco de Alimentos a persoa interesada ten que cubrir un formulario colgado na web http://www.bancoalimentosvigo.org/formulario/ ou tamén pode chamar ao 986 263022.

A Fundación Provincial Banco de Alimentos de Vigo, creado en 1995, é unha entidade benéfica independente, apolítica, aconfesional e sen ánimo de lucro cuxo principal obxectivo é axudar ás persoas máis desfavorecidas.

Durante 2016, a ONG repartiu máis de 2 millóns de quilos de comida (2.108.608 quilos), o que supón un 25 por cento máis que durante 2015. Xa nos seis primeiros meses de 2017, entregáronse preto de 1,2 millóns de quilos de alimentos na provincia de Pontevedra.

Anuncios