Amaral súmase ao vídeo homenaxe ás vítimas da violencia de xénero do CB Nigrán

Do mesmo xeito que as xogadoras de baloncesto Alba Torrens, Laura Nicholls ou Amaya Valdemoro, a escritora Sonia Mirón, o actor Antonio Durán “Morris” ou os futbolistas Jorge Otero e Javier Maté, Eva Amaral e Juan Aguirre, compoñentes do grupo musical Amaral, quixeron participar no vídeo en homenaxe ás vítimas da violencia de xénero que o CB Nigrán está a preparar para o próximo día 25. Amaral comunicou ao CB Nigrán que a iniciativa lle parece preciosa e que esperan sirva para axudar na sensibilización e prevención da violencia de xénero.

Xunto a eles outros colectivos como o club Amfiv, o Basketmi Ferrol ou os claustros de profesores dos colexios Humberto Juanes, Carlos Casares, Cruz Camos, Panxón e Mallón aparecerán no vídeo portando unha pelota de baloncesto, un balón por cada muller asasinada así como por cada un dos 7 nenos asasinados neste 2017.

Con cada un destes balóns que simbolizan ás vítimas o Club Baloncesto Nigrán debuxará un gran lazo na pista de xogo do Pavillón do Colexio de Panxón en torno ao cal se colocarán os xogadores, adestradores, directivos e familias do club, constituíndo esta foto a imaxe final que se incluirá no vídeo que o CB Nigrán produciu e que se fará público a partir do sábado 25 co obxectivo de concienciar e sensibilizar sobre esta lacra social que non cesa no seu goteo de vítimas.

Anuncios