Nigrán súmase por vez primeira á xornada de limpeza simultánea de praias

FOTO: CONCELLO DE NIGRÁN // Praia de Panxón.

O Concello de Nigrán súmase por vez primeira o sábado día 11 á sétima xornada de limpeza simultánea de praias capitaneada pola asociación ecoloxista Adega en coordinación co Campus do Mar e o Centro de Investigacións Mariñas da universidade de Vigo. Así, a praia de Panxón formará parte dos vinte areais de toda Galicia nos que se intervirá neste día que Nigrán encadra á súa vez nas súas actividades de concienciación medioambiental de “Nigrán, mar de sabores”.

Todas as persoas que o desexen poderán participar de modo voluntario inscribíndose ata o 10 de novembro no mail comunicacion@nigran.org (achegando nome e teléfono de contacto) ou ben na Oficina de Información Cidadá do Concello de Nigrán de 9.00 a 14.00 horas (986365000). Para o correcto desenvolvemento da limpeza haberá coordinadores por cada grupo de voluntarios, a duración estimada é de dúas horas e comezará ás 11:00 (punto de encontro no Pavillón de Panxón) achegando o Concello o material preciso para a recollida (luvas, bolsas…). Os interesados que desexen inscribirse como voluntarios-coordinadores deben solicitalo antes do 6 de novembro no enderezo campusmar@uvigo.es e asistir á xornada de formación gratuíta que se desenvolverá o día 9 de 16:00 a 19:30 na Universidade de Vigo.

As limpezas de praias son actos simbólicos, nos que non se debe ver ao voluntariado como man de obra barata para deixar limpos os areais. Son actividades de concienciación e educación ambiental que permiten que a cidadanía coñeza a problemática dos residuos mariños, a súa procedencia e os impactos que causan, así como avaliar cales son as medidas que cada un de nós pode desenvolver para minimizar este problema. Tapóns, bolsas, anacos de redes ou de cordas de nailon, son exemplos de restos de orixe plástico que alén do seu impacto visual supoñen un perigo para a fauna e a flora mariña e mesmo representarían, pola súa transferencia trófica, un risco para os seres humanos.

O Concello de Nigrán, como xa vén facendo co “Proxecto Ríos” de Adega que inclúe unha xornada de limpeza no esteiro do Miñor, quere concienciar tamén sobre a importancia dos valores da nosa costa, a problemática da contaminación mariña e das algas invasoras ou a alteración do ecosistema, así como promover as medidas que cada cidadán pode levar a cabo para minimizar estes impactos.

Anuncios