Alertan do risco de desprendemento de pedras no Monte do Castro de Chandebrito

FOTO: CONCELLO DE NIGRÁN // O Monte do Castro de Chandebrito tras os incendios forestais.

O Concello de Nigrán insta á Xunta de Galicia para que os seus técnicos estuden urxentemente se existe risco real de desprendemento de pedras no cumio do Monte do Castro e, no seu caso, tome todas as medidas preventivas ao respecto. A petición da propia Alcaldía, a Policía Local de Nigrán emitiu a semana pasada un informe no que se alude a un “posible perigo de desprendemento ante unha riada ou choiva” cos conseguintes danos que podería causar tanto nas edificacións como nas vivendas que se atopan na falda do monte, así como nos vehículos que circulan pola rúa da Igrexa e camiño das Pereiras. Este informe foi remitido xa á Comunidade de Montes, propietaria do terreo e quen tamén deu traslado á Xunta deste tema, e a súa vez o alcalde trasladou verbalmente a inquedanza ao delegado da Xunta e aos técnicos de Patrimonio na súa visita á contorna a semana pasada (estes últimos acudiron ao lugar a petición do propio Concello).

Segundo se constata, na ladeira Sur e Oeste existen grandes pedras nunha zona que presenta unha forte pendente e que actualmente non conta con vexetación ou matorral.

“O Concello trasladou o asunto á Comunidade de Montes, propietaria do terreo, e á súa vez pide á Xunta que o estude inmediatamente para determinar se efectivamente existe un perigo real ou non é así. Non queremos alarmar á poboación, pero preferimos pecar de precavidos”, resume o rexedor, Juan González.

Segundo as últimas cifras aportadas dende as comunidades de montes, en Chandebrito só sobreviviron aos incendios do día 15 de outubro 2 hectáreas do total de 232 que hai de monte comunal, mentres que na parroquia veciña de Camos sobreviviron 20 dun total de 370 hectáreas comunais. “As cifras dan información clara da magnitude do desastre para Nigrán”, apunta González, quen indica que os técnicos do Concello de Urbanismo e Desenvolvemento local son os encargados de asesorar aos veciños na tramitación das axudas para afectados que vén de aprobar a Xunta de Galicia.

Anuncios