Os veciños de Baiona que o pasado domingo, día 15 de outubro, envorcáronse na extinción dos incendios e prestaron desinteresadamente auga para sufocar os lumes que arrasaron a localidade, non verán aumentada a súa factura da auga.
Así o acordaron o Concello e Gestagua esta mañá nunha reunión mantida entre responsables municipais e responsables da empresa concesionaria do servizo de auga municipal.
“Desde o Concello somos coñecedores dos arduos esforzos realizados pola poboación de Baiona para sufocar as chamas que irremediablemente se achegaban ás súas vivendas, tendo moitos veciños que utilizar todos os medios á súa disposición, entre eles a utilización da auga de subministración domiciliaria”, sinalan.
Ante esta situación o consistorio non repercutirá nos recibos daquelas zonas afectadas os caudais de auga utilizados na extinción de incendios ou na axuda prestada para iso. Serán reducidos dos recibos os m3 de auga utilizados para esta causa en apoio aos cidadáns que realizaron un gran esforzo prestando, seguro que unha inestimable, axuda para minimizar os graves danos sufridos.
“Desde a compañía que fornece a auga municipal quixéronse solidarizar tamén cos baioneses polo que escoitou atentamente a petición que desde o Concello de Baiona fixemos para que os veciños da vila non teñan que pagar calquera excedente de auga utilizada nos labores de extinción. Para iso a concesionaria comparará as facturas deste período coas do ano pasado e non engadirá na factura calquera excedente de consumo”.
“Os veciños e veciñas envorcáronse, prestaron a súa axuda desinteresadamente e agradecemos o seu encomiable labor. Con esta colaboración coa concesionaria municipal queremos devolver parte do recibido aos baioneses”, referiron desde o Concello.
Delegación da Xunta en Vigo
O presidente da Xunta, Alberto Núñez Feijoo, chamou na mañá de onte ao Alcalde Baiona para coñecer de primeira man a situación na que se atopaba a vila tras os lumes. O presidente interesouse, preocupouse e solidarizouse enormemente polo acontecido no municipio e acordou co rexedor enviar ao delegado da Xunta en Vigo Ignacio López Chávez para avaliar a situación.
Esta mañá López Chávez desprazouse ata ao municipio e visitou as zonas afectadas polos incendios forestais. O Delegado da Xunta en Vigo manifestou a súa solidariedade co pobo baionés.
Desde a Xunta de Galicia están a estudar a posibilidade de ofrecer unha liña de subvencións para todas aquelas familias que sufriron danos nas súas vivendas.
