Eolo deixa sen regatas a primeira xornada da Liga de Outono AXA J80

FOTO: ROSANA CALVO // Parte da frota de J80 esperando ao vento na baía de Baiona.

Eolo foi o protagonista indiscutible da primeira xornada da Liga de Outono AXA J80, que se ía a celebrar esta tarde en Baiona pero que finalmente tivo que ser suspendida pola falta de vento na baía.

As previsións meteorolóxicas cumpríronse e tras manterse á boia durante máis de dúas horas, e ante a imposibilidade de establecer un campo de regatas cunhas mínimas condicións para disputar a competición, o comité de regata decidiu mandar aos veleiros de regreso a porto.

Os monotipos participantes, entre os que se atopa gran parte da frota de J80 do Monte Real Club de Yates, volverán á auga o vindeiro sábado 28 de outubro, para a segunda das catro xornadas programadas no campionato.

A cita coincidirá coa celebración en Baiona do summit de turismo náutico europeo Galicia Atlantic Destination, un evento no que se abordará a actualidade e retos de futuro do turismo náutico, prestando especial atención á situación de Galicia.

Promovido pola Xunta de Galicia a través da Axencia de Turismo de Galicia, Portos de Galicia e o Monte Real Club de Yates, o summit celebrarase os días 27 e 28 de outubro, e nel participarán representantes dos principais clubs e asociacións náuticas de Europa, así como xornalistas chegados de diferentes países.

Anuncios