Membros do GES reclaman un convenio colectivo no Pleno de Baiona

FOTO: ALBERTO RODRÍGUEZ // Membros do GES no Pleno de Baiona.

Membros do Grupo de Emerxencias Supramunicipal (GES) do Val Miñor asistiron este xoves ao Pleno celebrado no Concello de Baiona para denunciar a precariedade laboral e reclamar un convenio colectivo que regule as condicións de traballo.

Dende a CIG denuncian que o GES do Val Miñor carece dende hai dez anos dun convenio colectivo que regule os dereitos laborais do cadro de persoal, tendo que aturar unhas condicións salariais e materiais de absoluta precariedade. Así, critican que as nóminas roldan os 850 euros ao mes e que os vehículos que usan para desprazarse e para apagar o lume, así como as ferramentas utilizadas para a excarcelación de persoas, se atopan en mal estado.

Diante disto, optaron por convocar unha serie de protestas para reclamarlle á Mancomunidade que poña fin a esta situación. As mobilizacións comezaron o pasado luns cunha concentración no mercado de Sabarís-Baiona, e está previsto que se prolonguen durante este mes.

Anuncios