A remodelación do acceso ao porto pesqueiro de Baiona arrancou esta mañá. O porto pesqueiro baionés gañará en seguridade viaria e en harmonía tras as obras previstas. A reordenación inclúe un espazo axardinado e unha rotonda no acceso. Trátase do primeiro paso para avanzar na idea de «abrir Baiona ao mar» que o rexedor se expón desde que tomou posesión.
“Solicitei á empresa que as obras se leven a cabo no menor tempo posible para que os inconvenientes dos veciños sexan os menos posibles”, sinalou José Ángel Bahamonde. As obras do peirao executaranse en aproximadamente dous meses e esperouse a finalización da tempada estival co fin de evitar maiores inconvenientes ao denso tráfico deses meses na vila.
O proxecto prevé colocar unha glorieta de 28 metros de diámetro na calzada, entre Elduayen e Alférez Barreiro, para despexar o tráfico tanto no acceso ao peirao como na saída, especialmente complicada para os condutores que abandonan a zona en dirección a Vigo.
Crearase un xardín, que incluirá bancos e papeleiras, ocupará parte da fronte urbana do porto e incluirá un miradoiro duns 500 metros cadrados que permitirá contemplar a fortaleza de Monterreal e a baía sen apenas obstáculos. Desaparecerá así a fileira de colectores que actúa como barreira visual nun lateral orientado cara á Ribeira.
Tanto os servizos de taxis como o de autobús recolocaranse nas zonas próximas do lugar. En canto aos taxis, o seu servizo estará dispoñible nas rúas Elduayen e Cuba mentres que a parada do autobús trasladarase apenas uns metros do lugar actual.
“As obras darán continuidade ás actuacións levadas a cabo en Alférez Barreiro onde se crearon novas prazas de aparcadoiro. Hai que lembrar que a Xunta levou a cabo o reforzo do firme en toda a travesía costeira baionesa pavimentando tres quilómetros desde a rúa Areas en dirección a Baredo. A licitación do proxecto total supuxo un investimento por parte da Xunta de Galicia na nosa localidade de preto de 340.000 euros”, indicou Bahamonde.
