O Club Ciclista Rías Baixas presentou na contrarreloxo por equipos inaugural da Volta a Galicia a súa candidatura para revalidar o triunfo logrado o pasado ano na clasificación xeral. A entidade presidida por José Luis Chamorro asinou o segundo mellor tempo, a seis segundos do Supermercados Froiz, nos 10,2 quilómetros de percorrido pola localidade lucense de Monforte.
O bloque formado por Willem Smit, Jesús Nanclares, Jon Ander Tomei, Antonio Soto, Manuel Jiménez, Jaime Guzmán e Javier Ruiz Larrinaga asinou un rexistro de 12 minutos e 21 segundos, batendo por 1 segundo ao Liberty Seguros portugués. A cuarta posición correspondeulle ao Aldro (12:33) e a quinta ao Gsport-Valencia (12:34).
Tras o aperitivo inicial da XVI Volta a Galicia, Monforte repetirá este venres como punto de saída e chegada na primeira etapa en liña. Serán 143,1 kms con tres portos de montaña, un de terceira categoría, Chantada (km 35) e dous de segunda categoría, Orxainza (km 69) e A Cruz do Incio (km 95).
