Praia América será unha das localizacións estrela da nova campaña da Dirección Xeral de Tráfico (DXT) destinada ás redes sociais. Unha escena rodada esta mañá no areal nigranés pechará unha serie de spots nos que a DXT abandonará o seu ton máis dramático para, cunha tinguidura de humor, concienciar sobre a importancia de coidar o vehículo porque el, á súa vez, coida de ti. Trátase dunha escena na que unha moza vestida de branco corre emocionada pola beira da praia para abrazar un todoterreo vermello e é a única gravada en Galicia.
«A DXT, a través da produtora, púxose en contacto co Concello de Nigrán e, tras pedir autorización á Demarcación Xeral de Costas, démoslle todas as facilidades porque consideramos que é unha oportunidade perfecta para promocionar as nosas praias en toda España», sinala Diego García Moreira, edil de Medio Ambiente e quen supervisou durante toda a mañá que o traballo non prexudicase en absoluto ao areal. Neste sentido, dende a produtora madrileña Micropixel, que trasladou a 30 profesionais para a rodaxe, refiren entre os principais motivos para desprazarse a Nigrán as facilidades dadas dende o Concello e que a praia cumpre cos requisitos que andaban buscando: «É marabillosa, de area branca e moi ampla, perfecta para o que queríamos. Ademais, non é un lugar masificado, polo que a rodaxe é moito máis sinxela do que podería ser no Levante», sinala o xefe de produción.
A gravación levouse a cabo durante toda a mañá (de 6:00 a 13:30 horas) e coincidindo en luns por ser un día de menos afluencia de bañistas. Así, reserváronse para este traballo 200 metros de areal á altura da Escola de Vela, colaborando en todo momento Protección Civil e Policía Local de Nigrán. «Foi un luns de mañá co obxectivo de prexudicar o menos posible aos bañistas que soen empregar este tramo de praia», resume o alcalde, Juan A.González.
