O Aceites Abril dos irmáns Luis e Jorge Pérez Canal logrou revalidar este martes o seu título de campión do Conde de Gondomar, un trofeo que o barco do Real Club Náutico de Vigo xa gañara en dúas edicións anteriores, nos anos 2013 e 2016.
Os ourensáns partían entre os favoritos para facerse co campionato organizado polo Monte Real Club de Yates co patrocinio de Banco Sabadell, e non defraudaron sobre a auga. Foron os máis rápidos en completar a etapa do Carrumeiro Chico, a máis longa da competición, e lograron cruzar a liña de chegada sempre entre os primeiros no resto de probas celebradas desde o pasado sábado nas Rías Baixas.
Os do Aceites Abril levaron o ouro da competición deixándolle a prata aos seus compañeiros de club, os tripulantes do Pairo 8, que navegaron nesta edición liderados por dous novísimos patróns de apenas 22 anos, Alberto Basadre e Luis Bugallo. Alternándose á cana nas diferentes etapas, ambos foron quen de coar ao barco armado por José Luis Freire no podio de honra.
O bronce da competición levoullo outro dos barcos que máis destacaron nas regatas, o novo Solventis de Alberto Moro, que navegou lucindo grímpola do Monte Real Club de Yates e con Malalo Bermúdez á roda.
O esquema da clasificación xeral definitiva, de Aceites Abril – Pairo – Solventis, foi o que resultou tamén na clase Storax ORC 0-1, que esta tarde disputouse no fondeadeiro das Illas Cíes as dúas últimas probas do trofeo. Foron dous percorridos barlovento sotavento, dunhas 6 millas de distancia, que a frota ao completo navegou cun vento do noroeste dunha media de 14 nós con refachos de 18.
O Unus de Luis García Trigo, do Monte Real, foi o barco que se fixo coa vitoria na clase PSA Retail ORC 2-3. Fíxoo mellorando os seus resultados en cada unha das probas que se foron disputando desde o pasado sábado. O segundo premio da clase foise á Marina de Sada da man do Inosa, de Cándido Losada; e o terceiro levoullo o Fend la Bise, de Jean Claude Sarrade, que correu polo club organizador.
Na clase Coca Cola ORC 4, o podio quedou conformado da seguinte maneira: ao máis alto elevouse o Balea Dous do Real Club Náutico de Rodeira. Con Luis María Pérez aos mandos, a tripulación asinou os mellores resultados da súa categoría, con tres primeiros postos nas catro probas disputadas. Os seguintes chanzos de gañadores cubríronos dous barcos do Monte Real, o Margem do Azul III de Santiago Gómez e Frederico Lopes; e o Abal Avogados/Lagar de Pintos/Fanautic de Mariano Dios.
Na cuadraxésimo segunda edición do Trofeo Conde de Gondomar tiveron tamén cabida os monotipos, tanto J80 como Fígaros. En clase J80 Rías Baixas o Okofen de Javier de la Gándara partía como favorito e, a pesar de non poder lograr pleno de vitorias, foi o gañador indiscutible. O Marías de Manuel María Cunha e o Virazón de Guillermo Caamaño quedaron segundo e terceiro respectivamente.
Na competición da clase Fígaro Martin Miller, foi na que máis variou a clasificación ao longo das diferentes regatas, producíndose cambios continuos nos primeiros postos. Finalmente subíronse ao podio o Tutatis de Brais Acevedo; o Erizana de Rosalía Martínez e o Silleiro de Santiago Meygide.
Na entrega de premios do Conde de Gondomar, á que asistiu o Subdirector Xeral de Banco Sabadell, Pablo Junceda, como principal patrocinador, tamén se entregou a placa ao gañador do Campionato de España de Altura PSA Retail Zona Galicia, que gañou o Siradella do Club Náutico de Portosín, patroneado por Francisco Gude.
O regatista Pablo Marquina, de dez anos de idade, levou unha mención de honra ao participante máis novo do Conde, no que competiu como tripulante do J80 Virazón.
A próxima cita no calendario de regatas do Monte Real Club de Yates é o Trofeo Principe de Asturias, que se celebrará os días 1, 2 e 3 de setembro.
CLASIFICACION XERAL 42º CONDE DE GONDOMAR
GAÑADOR DO 42º CONDE DE GONDOMAR • TROFEO BANCO SABADELL
ACEITES ABRIL • LUIS E JORGE PÉREZ CANAL • RCN VIGO
CAMPIONATO DE ESPAÑA DE ALTURA PSA RETAIL ZONA GALICIA
SIRADELLA • FRANCISCO GUDE • RCN PORTOSÍN
CLASE STORAX ORC 0-1
1. ACEITES ABRIL • LUIS Y JORGE PÉREZ CANAL • RNC VIGO
2. PAIRO 8 • ALBERTO BASADRE/LUIS BUGALLO • RCN VIGO
3. SOLVENTIS • MALALO BERMÚDEZ • MRCYB
CLASE PSA RETAIL ORC 2-3
1. UNUS • LUIS GARCÍA TRIGO • MRCYB
2. INOSA • CÁNDIDO LOSADA • MARINA DE SADA
3. FEND LA BISE • JEAN CLAUDE SARRADE • MRCYB
CLASE COCA COLA ORC 4
1. BALEA DOUS • LUIS MARÍA PÉREZ • RCN RODEIRA
2. MARGEM DO AZUL III • SANTIAGO LÓPEZ • MRCYB
3. ABAL ABOGADOS/LAGAR DE PINTOS/FANAUTIC • MARIANO DIOS • MRCYB
CLASE J80 RÍAS BAIXAS
1. OKOFEN • JAVIER DE LA GÁNDARA • MRCYB
2. MARÍAS • MANUEL CUNHA • MRCYB
3. VIRAZÓN • WILLY CAAMAÑO • MRCYB
CLASE FÍGARO MARTIN MILLER
1. TUTATIS • BRAIS ACEVEDO • MRCYB
2. ERIZANA • ROSALÍA MARTÍNEZ • MRCYB
3. SILLEIRO • SANTIAGO MEYGIDE • MRCYB
